Pas takimit të dështuar dhe tejet të tensionuar mes Presidentit amerikan Donald Trump dhe atij ukrainas Volodimir Zelenski, kanë reaguar liderët europianë.
Në një postim në rrjetet sociale, Kryeministri polak dhe ish-Presidenti i KiE, Donald Tusk, iu drejtua Zelenskit dhe i tha: “Të dashur miq ukrainas, ju nuk jeni vetëm”.
Nga ana tjetër, Presidenti Macron, i pyetur për këtë debat teksa po viziton Portugalinë, tha se Rusia është vendi agresor dhe se Ukraina po sulmohet.
Sipas Macron, është e rëndësishme që të tregohet respekt ndaj atyre që kanë luftuar prej fillimit për të mbrojtur dinjitetin, të drejtat dhe sigurinë e Europës.
Presidenti francez theksoi se vendet europiane dhe aleatët e tjerë kishin të drejtë që ndihmuan Ukrainën prej 3 vitesh dhe sanksionuan Rusinë.
Zelenski ndodhet sot në SHBA ku u takua në Shtëpinë e Bardhë me Presidentin Trump dhe zëvendësin e tij JD Vance, me të cilët pati përplasje të ashpër live.
Për shkak të tensioneve, marrëveshja e mineraleve të rralla nuk u nënshkrua dhe Zelenski u largua nga Shtëpia e Bardhë.
