Dua Lipa dëshiron vetëm të nxisë sa më shumë njerëz në mbarë botën të marrin një libër në dorë dhe të lexojnë. Që prej vitit 2021, ylli i muzikës pop është angazhuar në promovimin e letërsisë përmes klubit të saj të librave, Service95. Tashmë, ajo po e çon këtë mision një hap më tej, duke hapur bibliotekën e saj të parë fizike.
Versioni i parë fizik i Service95, i quajtur Biblioteka Manifesto, do të hapet më 27 qershor, në kuadër të festivalit të ri ndërkombëtar të librit BABELL – City of Books. Biblioteka e Dua Lipës do të ketë një vendndodhje të përhershme brenda librarisë së famshme Livraria Lello, në Porto të Portugalisë.
“Kur themelova Klubin e Librit Service95, ambicia ime ishte që ai të bëhej një shtëpi për shkrimtarët dhe lexuesit, kudo që ndodhen dhe pavarësisht rrethanave të tyre. Leximi i botës na afron me njëri-tjetrin, por fatkeqësisht jo të gjithë e mbështesin këtë,” tha Lipa.
Ajo shtoi se biblioteka do të përmbajë 100 libra që “ngrenë pyetje ose kanë qenë vetë objekt i polemikave”.
“Këtu do të gjeni njëqind libra që shtrojnë pyetje ose që janë vënë në pikëpyetje. Disa prej tyre janë ndaluar në shkolla për shkak të temave që trajtojnë, si raca apo seksualiteti. Të tjerë, të shkruar për lexuesit e komunitetit LGBTQIA+, janë kufizuar nga ekspozimi publik. Në disa raste, autorët kanë paguar me jetën për fjalët që kanë shkruar,” u shpreh Dua Lipa.
Ajo vijoi:
“Jeni të ftuar ta vizitoni dhe të vendosni vetë se çfarë meriton të jetë në këto rafte. Sepse ndonjëherë gjëja më subversive që mund të bësh është të lexosh një libër dhe më pas të flasësh për të.”
Gati 100 libra do të jenë pjesë e auditorit të ri kulturor të Livraria Lello, ku secili prej tyre lidhet me katër tema kryesore: pushtetin, kontrollin, zërin dhe kujtesën.
Në Bibliotekën Manifesto do të jenë të disponueshme edhe vepra të njohura si “The Handmaid’s Tale” e Margaret Atwood dhe “Felon” e Reginald Dwayne Betts, së bashku me përzgjedhje nga autorë si Salman Rushdie dhe Olga Tokarczuk.
“Për 120 vite, Livraria Lello është ndërtuar mbi një bindje të thjeshtë: libri është një teknologji e lirisë. Biblioteka Manifesto lind nga kjo bindje,” tha në një deklaratë drejtuesja e markës së Livraria Lello, Francisca Pedro Pinto.
Ajo shtoi: “Sepse ajo që është në lojë nuk është vetëm e ardhmja e leximit, por edhe aftësia e një shoqërie për të imagjinuar, interpretuar dhe ndërtuar të ardhmen e saj.”
