“PS shkon në zgjedhje pa asnjë koalicion sepse koalicioni na zhgënjeu”. Kështu është shprehur nga Libohova, kandidatja Mirela Kumbaro gjatë takimit të organizuar me socialistët për 26 vjetorin e PS-së. Ajo ka kërkuar mbështetje masive për Edi Ramën dhe PS duke shpjeguar rëndësinë e votës për një të ardhme më të sigurt. Kumbaro ka pohuar se momenti i hedhjes së votës nuk është një angari, një gjest i momentit për ta hequr qafe dhe as një qokë personale, por momenti më i rëndësishëm që të jepet njëherë në katër vjet dhe vulos ecurinë e të ardhmes së vendit dhe gjithsecilit prej nesh.
“Është shumë e rëndësishme që me çdo libohovitë, me çdo shok e mik të shpjegojmë që momenti i hedhjes së votës nuk është një angari, një gjest i momentit për ta hequr qafe, as një qokë personale. Si mundet vota juaj të jetë një karamele që i jepet X-it? Si mundet vota, që është momenti më i rëndësishëm njëherë në katër vjet të jepet rastësisht për kë të del para? Si mundet të ardhmen tonë, të ardhmen e Libohovës t’ia lemë rastësisë, t’ia lemë një qoke. Ne në zgjedhje shkojmë pa asnjë koalicion, sepse koalicioni na zhgënjeu, prandaj futemi të vetëm si PS me të vetmin kryeministër, me një qeveri 100 % socialiste , pranda j është e rëndësishme të votojmë të gjithë numrin 2, Partinë Socialiste” – tha Kumbaro.
Kumbaro përmendi disa prej investimeve kryesore në Bashkinë Libohovë duke theksuar se ishte vota popullore për Partinë Socialiste, ajo që riktheu shpresën e të rinjve dhe të të gjitha brezave në Libohovë. Kumbaro dha premtimin e zgjidhjes përfundimtare të problemit të kanaleve vaditëse e kulluese brenda dy viteve të mandatit të ardhshëm.
“Në këto 4 vite qeveria socialiste, pra ajo pjesë e qeverisë që zbatoi programin e Edi Ramës, Rilindja Urbane, u shtri në çdo qytet pavarësisht se për kë votuan njerëzit dhe pavarësisht nga mendimet e tyre. Një javë më parë ishim bashkë me Edi Ramën në Labovën e Kryqit, ku ju e patë ndryshimin transformues. Kemi bërë detyrën shumë të vonuar që duhej të ishte bërë kohë më parë, për rrugën e Labovës, por edhe atë të Bulos apo në fushë Nepravishtë që fillon muajin tjetër, pa folur për qendrën e Libohovës e cila do ta rigjenerojë gjithë qytetin dhe shumë punë të tjera. Kryeministri tha se ‘në fakt ne po bëjmë detyrën’, por jeni ju që me votën tuaj vendosët të votoni për Kryetaren e Bashkisë së Partisë Socialiste që riktheu shpresën e të rinjve dhe të të gjithë brezave në Libohovë. Është projekti që e kthen Libohovën në një qendër turistike, projekti ku duhet të zgjidhim përfundimisht problemin e bujqësisë. Për 25 vite kanalet vaditëse e kulluese janë të bllokuara,por ne kemi filluar të punojmë dhe brenda dy viteve të para zgjidhet përfundimisht ky problem” – pohoi kandidatja socialiste në një atmosferë entuziaste me libohovitë të të gjithë brezave.
ma.me
