Një sfidë e re mund ta presë Kosovën pas liberalizimit të vizave. Më shumë se gjysma e të rinjve po presin vendosjen e lëvizjes së lirë si një mundësi për t’u larguar nga vendi. Rreth 60 për qind e të rinjve kosovarë pritet ta lënë Kosovën për të kërkuar një jetë më të mirë në vendet perëndimore.
Shifra është bërë publike gjatë tryezës së organizuar nga Oda Ekonomike Amerikane në Kosovë “Disponueshmëria e fuqisë punëtore në Kosovë”.
Siç raporton Kosovapress, kryetari i Bordit të Odës Ekonomike Amerikane, Ilir Ibrahimi, ka thënë se në bazë të statistikave, papunësia në Kosovë është rreth 30 për qind, mirëpo sipas tij, në anën tjetër ka mungesë të punëtorëve të kualifikuar në profile të ndryshme.
Vendosjen e lëvizjes së lirë duket se po e presin edhe punonjësit e kualifikuar.
“Nuk janë vetëm ata që janë të papunë që dëshirojnë të ikin nga Kosova, por janë të interesuar edhe ata që janë të punësuar me përvojë. Kështu që është një sfidë që do ta pres Kosovën pas liberalizimit të vizave”, ka thënë Sharon Hart, Presidente e RIT-it.
Për këtë, ajo ka propozuar që të ndiqet një strategji për të mbajtur punëtorët e kualifikuar, përmes ngritjes së pagave.
a.ç
