Partia Demokratike e Kosovës, është kundër liberalizimit të tregut të energjisë, pasi do të ndikojë negativisht në ekonominë e mbi 1 300 bizneseve.
Abelard Tahiri, deputet i PDK-së, njofton se kjo forcë politike shpall zyrtarisht kundërshtimin e këtij vendimi të ZRRE-së. Ai shprehet se një vendim i tillë rrezikon mbi 140 mijë vende pune, shkakton rritje të çmimeve, gjë që pason në lëkundjen e ekonomisë në vend.
Për këtë, Tahiri i bën thirrje ZRRE-së që të tërhiqet nga ky vendim, pasi në të kundërt Partia Demokratike e Kosovës do i drejtohet Gjykatës Themelore për vendosjen e një mase të përkohshme. Deputeti shpreh bindjen se nëse arrin deri në këtë pikë, PDK-ja fiton “betejën” ligjore.
“Sot, në emër të PDK-së, kemi dorëzuar zyrtarisht kundërshtimin administrativ ndaj vendimit të ZRRE-së që nga 1 qershori largon mbi 1,300 biznese nga shërbimi universal i energjisë dhe i kalon në tregun e lirë.
Ky vendim rrezikon mbi 140 mijë vende pune, shkakton rritje të çmimeve dhe kërcënon stabilitetin ekonomik të vendit. Është marrë pa analizë konkurruese, pa konsultime institucionale dhe në kundërshtim me vërejtjet e Avokatit të Popullit, odave dhe shoqërisë civile.
Në një treg të dominuar nga KESCO dhe çmime deri 280% më të larta, nuk mund të flitet për konkurrencë të ndershme. Prandaj kërkojmë pezullimin urgjent të këtij vendimi dhe rikthimin në një proces të drejtë dhe transparent.
Nëse ZRRE nuk tërhiqet, do t’i drejtohemi Gjykatës Themelore për vendosjen e një mase të përkohshme. Jemi të bindur se do të dalim fitues – në mbrojtje të interesit publik dhe ekonomisë së vendit”, shkruan Tahiri në platformën “Facebook’.
Kritika pati nga ana e Albin Kurtit ndaj Odës Ekonomike, duke u shprehur se shtyrja e zbatimit të liberalizimit të tregut “nuk i zgjidh” problemet e bizneseve.
“Oda Ekonomike e Kosovës, që do të duhej të qëndronte pranë bizneseve për t’u përballur me realitetin e ri, sot po tenton t’i bllokojë rrugët vetëm me një kërkesë; shtyrjen e zbatimit të liberalizimit të tregut. Shtyrjen po e kërkojnë me arsyetimin se do të përgatiten për një vit, duke injoruar faktin se nga ana e tyre nuk kanë bërë asnjë përgatitje për tetë vjetët e kaluara, përderisa shtyhej ky proces”, tha Kurti.
Kujtojmë se një ditë më parë, përfaqësues të rreth 1 300 kompanive në Kosovë protestuan kundër liberalizimit të tregut energjisë, pasi shprehën se nuk kanë bërë përgatitjet e nevojshme për t’u përballur me këtë ndryshim drastik. Ata kërkuan që për këtë arsye, vendimi i ZRRE të shtyhet për një vit.
Në rast se ZRRE nuk tërhiqet, vendimi i saj hyn në fuqi me datë 1 qershor. Ky vendim nënkupton se të gjitha bizneset e mëdha nuk do të furnizohen më me energji përmes tarifave të rregulluara, por duhet të gjejnë vetë furnizuesin e tyre në tregun e lirë. Nëse nuk arrijnë ta bëjnë këtë, ato kalojnë automatikisht në treg të hapur me çmime të parregulluara.
