Prej 3 vitesh, 160 fëmijë të kopshtit “Besëlidhja” në qytetin e Lezhës vijojnë të akomodohen në katin e tretë të konviktit të shkollës profesionale.
Kopshti ekzistues u shemb që në vend të tij të ndërtohej një tjetër i ri. U premtua që vështirësitë do të ishin vetëm një vit, pasi do të ndërtohej një kopsht i ri brenda të gjitha standardeve, por prej tre vitesh objekti qëndron në këtë fazë, madje duke u kthyer në një burim infeksionesh, pasi ndodhet në qendër të qytetit.
Në mungesë të kopshtit, dhomat e konviktit të shkollës profesionale u përshtaten në salla për fëmijët.
Prindërit ngrenë shqetësimin për kushtet e papërshtatshme për fëmijët e tyre, duke kërkuar që të merren masa të menjëhershme.
Shqetësuese, e vlerëson situatën edhe bashkia e Lezhës. I kontaktuar për këtë çështje, kreu i kësaj njësie vendore Fran Frrokaj ka bërë të ditur se i është dorëzuar Ministrisë së Arsimit projekti për kopshtin dhe çerdhen, duke pritur financimin nga ky dikaster për t’i dhënë zgjidhje kësaj problematike.
Po sipas Frrokajt, aktualisht do të bëhet përshtatja në kopsht e katit të parë të ish-gjimnazit të Lezhës, kjo për të lehtësuar sadopak problematikën që shfaqet.
ma.me
