Pushuesit që do të zgjedhin plazhin e Tales këtë verë do të kenë një zgjidhje për të shmangur trafikun.
Një rrugë lidhëse që përshkon fshatin Mylte po ndërtohet nga Bashkia e Lezhës për ti dhënë zgjidhje kësaj problematike ndërsa do të shkurtojë me 8 km distancën me Lezhën.
Për banorët kjo është një mundësi që ata të zhvillojnë bujqësinë pasi prej vitesh nuk kishin parë asfalt në fshatin e tyre.
Administratori i Shënkollit, Albert Rrusti, e cilëson një rrugë për bujqësinë dhe turizmin
“Është një financim me të ardhurat e bashkisë që u shërben rreth 2500-3000 banorëve. Kjo rrugë do të lehtësojë shumë trafikun për të shkuar në bregdet dhe do të shkurtojë rreth 7-8 km rrugë nga Lezha për të shkuar në bregdet.”
Trafiku është një problematikë që ka shoqëruar ndër vite sezonin turistik në bregdetin e Shëngjinit, ndërsa mungesa e investimeve sipas banorëve ka mbajtur peng potencialet e zhvillimit në bujqësie e sektorë të tjerë të zonës së ShënKollit.
