Një seri fotografish të publikuara nga Lewis Hamilton në Instagram ka rikthyer vëmendjen te afrimiteti i tij me Kim Kardashian. Piloti i Ferrarit ndodhet me pushime verore në Hawaii dhe albumin e ka shoqëruar vetëm me përshkrimin “Foto jashtë”.
Mes imazheve, spikat momenti kur Hamilton dhe ylli amerikan shfaqen të përqafuar pranë detit. Në fotografi, 41-vjeçari mban Kardashian në krahë, duke ushqyer edhe më shumë aludimet për raportin mes tyre.
Megjithatë, ditët në ishujt tropikalë nuk janë kufizuar vetëm te skenat romantike. Hamilton ka ndarë edhe pamje nga aktivitetet në natyrë, si dhe çaste qetësie të kaluar me miqtë.
Në një prej fotove, piloti shihet me një dërrasë sërfi nën sqetull, përpara dallgëve. Në një tjetër, ai pozon pranë Kardashian i veshur për paintball. Dyshja është parë gjithashtu duke luajtur letra dhe duke shijuar kohën larg garave të Formula 1.
Albumi pasqyron një anë më të çlirët të jetës së Hamilton gjatë pushimeve, ndërsa lidhja e tij me Kim Kardashian vijon të jetë në qendër të interesimit të fansave dhe mediave.
