Lëvizja e deputetëve nga një parti në tjetrën në sesionin e shkuar parlamentar u shoqëruar me shkrirjen e dy grupeve parlamentare në Kuvend, Partisë Republikane dhe Partisë për Drejtësi Integrim dhe Unitet.
Me nisjen e sesionit të ri kuvendor dhe ndryshimin e aleancave këto dy parti do jenë sërish në tryezën e partive parlamentare të përfaqësuara me siglën e tyre edhe pse me deputetë të marrë “borxh” nga tre partitë e mëdha PS-PD-LSI.
‘Ora News’ shkruan se kjo bëhet për të mundësuar numrin e 7 deputetëve që nevojiten në parlament për të formuar një grup parlamentar.
PDIU
PDIU që në muajt e fundit iu bashkua koalicionit qeverisës ka në përbërje 4 deputetë, por ka marrë borxh 3 deputetë, Anduel Xhindin nga PS dhe Gledion Rehovicën dhe Bujar Dervenin nga LSI.
Me prurjet e reja PDIU plotësoi vendin bosh të lënë nga Dashamir Tahiri që merr pjesë në mbledhjet e grupit parlamentar të PD, por që zyrtarisht figuron në listën e deputetëve të pavarur.
PR
Ndërkohë Partia Republikane ka vetëm 2 depuetët të zgjedhur nga sigla e PR dhe 5 deputetë të marrë “borxh” nga PD, Bedri Hoxha, Mhill Fufi, Astrit Veliaj,Florian Mima dhe Gjovalin Bzhetaj.
Sesionin e shkuar partia e Fatmir Mediut pësoi tkurrje të numrit të deputetëve për shkak të largimit të dy deputetëve tek LSI, Luan Duzha dhe Ylli Shehu.
Të pavarur në faqen zyrtare të Kuvendit figurojnë 8 deputetë, Mesila Doda e larguar nga PD, Tom Doshi, Nard Ndoka, Vangjel Dule, Dashamir Tahiri, Mirela Ferracaku që mori mandatin e Mark Frrokut dhe deputetët e PD Mimoza Hajdarmataj dhe Alban Zeneli.
