Prokurori i Përgjithshëm, Adriatik Llalla, ka firmosur një sërë ndryshimesh në strukturat e prokurorive të disa rretheve gjyqësore në vend.
Burime pranë Prokurorisë së Përgjithshme konfirmuan se lëvizjet kanë prekur prokurorë në pozicione drejtuese, por edhe prokurorë të thjeshtë. Sipas burimeve, prokurori Ndini Tavani është komanduar si drejtues në njësinë Task-Forcë të Prokurorisë së Tiranës.
Nga ana tjetër, paraardhësja në këtë pozicion, prokurorja Deniona Katro, është emëruar si drejtuese e njësisë Task-Forcë në Prokurorinë e Durrësit.
Prokurorja e Fierit, Mirela Mërtiri, është komanduar zv.prokurore në Prokurorinë e kryeqytetit. Drejtuesi i Prokurorisë së Tiranës, Petrit Fusha dhe ai i Prokurorisë së Vlorës, Ramadan Troci, janë votuar nga anëtarët e Këshillit të Prokurorisë për të lëvizur drejt Prokurorisë së Përgjithshme, lëvizje që pritet të dekretohen nga ana e Presidentit Bujar Nishani.
Sipas burimeve, prokurori Elvin Gogaj është emëruar drejtues në Prokurorinë e Apelit Shkodër, ndërsa prokurori i Shkodrës, Simon Pashuku, është emëruar drejtues në Prokurorinë e Lezhës.
Prokurori Artur Ismailukaj është emëruar në pozicionin e titullarit në Prokurorinë e Tropojës, ndërsa prokurori Shkëlzen Cena në atë të Peshkopisë. Prokurori Zeqir Hoxha, nga drejtues në Lezhë, emërohet prokuror i thjeshtë në Tiranë.
Prokurori Vladimir Mara, nga prokuror i thjeshtë në Durrës, është emëruar prokuror në Prokurorinë e Krimeve të Rënda.
Panorama/d.i.
