Letër Koço Kokëdhimës

Nga Qemal Nisllaj*

Për kulturë më duhet t’ju kërkoj ndjesë që po “ju shqetësoj” duke ju shkruajtur për herë të dytë, përveç mesazheve, se jam i bindur që deri sa nuk keni denjuar të më përgjigjeshit, natyrisht që as keni denjuar të lexoni letrën time.

I kam ndjekur me vëmendje të madhe punimet e Kongresit të PS, të gjitha diskutimet drejtpërsëdrejti nga TV e veçanërisht vëmendja u përqëndrua tek diskutimi i atyre që kishin më tepër interes për mua, njëri prej të cilëve je ti!

Përsëri për efekt të kulturës sime, për herë të dytë kërkoj ndjesë që më poshtë po të drejtohem me “ti”, sepse në fakt, mbase gaboj o zoti Koço se popull jam unë, por në konceptin tim të drejtuarit me “ju”, është më tepër shenjë respekti se sa edukate dhe ti e ke humbur atë që më imponon të drejtohem me ju, e ke humbur respektin tim.

Më ka mbetur në mendje, një fragment vërtet mallëngjyes nga fjalimi yt madhështor:

“Të presim qytetarët e të mirëmbajmë marrëdhëniet me publikun”… sa për të qeshur dhe për të qarë, për një deputet që po e kthen PS ne Jug të vendit në “parcelë” të vetën, për një deputet që injoron kërkesat e qytetarëve të Jugut që e kanë votuar, madje nuk denjon as të përgjigjet dhe jo më të marrë mundimin për të takuar qytetarët…

Zoti Koço!

E quan veten “deputet të popullit”, ndërsa mua votuesit lab të Jugut, përsëri duke më ardhur edhe për të qeshur, edhe për të qarë, nuk e di pse por kjo vetëquajtje, më kujtoi një farë Aleks Xinxa në një film artistik të periudhës së kaluar, si i vetëquajtur kryetar i Partisë Komuniste…

Ehhhh… more zoti Koço, prapë mbase e kam gabim që mendoj kështu unë populli, se më mire e dini “ju”, por i popullit nuk quhesh, bëhesh, dhe nga e thëna në të bërë shkon në mes një lum i tërë…

Ti mund të jesh deputet, madje edhe më lartë akoma mund të bësh karrierë politike, se sot është koha e paradokseve të mëdha, por deputet i popullit, me këtë mënyrë të vepruari e të injoruari që u bën votuesve të tu, nuk mund të bëhesh kurrë,kurrë…

Ti je deputet dhe do të ngelesh i tillë për sa kohë Partia Socialiste të të propozojë, por thjesht dhe vetëm një deputet i Partisë Socialiste, i popullit asnjëherë…

Sepse e di ç’ndodh në të vërtetë o zoti Koço?!… Ti dhe një pjesë deputetësh si ti e Dasho Kamberi, përfitoni nga idealizmi i disa njerëzve si puna ime, e që fatkeqësisht nuk jemi pak, madje jemi ende shumë, idealizëm i cili në fakt edhe Partinë Socialiste e dëmton, por po kaq e akoma më tepër na dëmton ne pjesën idealiste të së majtës…

“Arritje e madhe” e jotja ajo në Kongresin e PS për reformat në Parti, dhe flet se janë bërë duke pyetur masat e socialistëve… sa për të qeshur, aq edhe për të qarë, sepse ti në fakt takon, mbledh e pyet vetëm njerëzit e tu të afërt, ata që të vijnë nga pas e që quhen stafi yt,ca djem e vajza të reja që nuk pyesin njeri e nuk i njeh njeri, përveç atyre zyrave që u ke dhënë ti, por që fatkeqësisht i njeh dhe i dëgjon ti…

Krenohesh aty në Kongres për sasinë e madhe të anëtaresimeve në Partinë Socialiste, gjëja më e padrejtë dhe më e pandershme që bën kur e thua me atë mënyrën aq delirante…

Jo more zoti Koço jooooo… mos u gabo e mos u ekzalto, sepse askush nuk është bërë anëtar i Partisë Socialiste nga puna jote dhe e “stafit tënd” të papërgjegjshëm…

Ty të gënjen stafi, ndërsa ti  gënjen mendjen e gënjen Partinë, nqs mendon vërtetë kështu…

Edhe unë, megjithëse jam i hershëm, madje shumë i hershëm në Partinë Socialiste, që me krijimin e saj, atëhere kur ti besoj se nuk kishe ndonjë lidhje me PS se nuk ta kam dëgjuar emrin kund, nuk kam qenë anëtar i Partisë Socialiste, sepse e kisha të ndaluar me Status si Ushtarak.

Por kam punuar, kam sakrifikuar e jam persekutuar ekonomikisht e në karrierë për shkak të asaj cka kam dhënë për PS, në të cilën ti erdhe dhe e gjete gati për tu bërë deputet.

Dhe e di çfarë o zoti Koço… kam vendosur të marr edhe unë teserën e Partisë Socialiste, dhe jo vetëm kaq, por do ti jap PS nga familja ime tre anëtarë dhe këtë e bëj për një arsye shumë më madhore se interesat e mia si qytetar dhe po ashtu shumë më madhore edhe se për interesat e tua të ngushta si “deputet të popullit”:

Dua të të tregoj ty, se Partia Socialiste duhet inkurajuar në të përgjithshmen për atë çka ka bërë e bën si Parti, dua si qytetar të inkurajoj kryetarin e Partisë Socialiste që të vazhdojë më tej atë çka ai dhe Partia Socialiste ka nisur e që mendoj dhe besoj se është vetëm fillimi dhe njëkohësisht, të të tregoj përsëri ty, se në Partinë Socialiste duhet të anëtarësohen e ta marrin në dorë me të vërtet ata njerëz, që nesër të jenë në kuptimin e vërtetë të fjalës, deputetë të popullit!

Zoti Koço, së fundi dua të të bëj dy pyetje, në këtë letër që po të dërgoj e pastaj nqs përsëri nuk do të marr përgjigje, do të ti bëj ato publikisht:

Së pari: E ke të pamundur vërtet ti sot, për shkak të kohës së zënë nga punët e mëdha e hallet e popullit, të paktën vetëm sa tu përgjigjesh kërkesave e ankesave të njerëzve, madje edhe nëpërmjet “stafit” tend, pa lere për ti zgjidhur?!… sepse për të qenë I sinqertë, nuk jam vetëm unë në rrethin shoqëror të anëtarëve apo simpatizantëve të PS e madje më tej, janë shumë, shumë më shumë se ç’kujton ti ata që mendojnë si unë, dhe e di çfar o zoti Koço…na duket më tepër e qëllimshme për të  mbjellë pakënaqësi dhe për të korrur firo, firo në radhët e PS e rrjedhje drejt aleatëve të saj, pa të cilët ti mendon se PS nuk qeveris dot!

Së dyti: A do ta kesh vallë ti kurajon, personalitetin e dinjitetin pas një viti të përballesh e të më kërkosh mua votën për “deputet të popullit”?!…

Të presim e të shohim gjykimin e reflektimin tend si “deputet i popullit”, e mirëpres atë përballje publike, jo në medja, se medjat janë vetëm pronë e politikës dhe e disa analistëve e gazetarëve të paguar si prone e politikës…

E mirëpres në takimet që do bësh ti si kandidat për “deputet i popullit” me popullin.

Se që ta mësosh ti o zoti Koço, meqë në letra me siguri nuk e ke lexuar, unë jam ish ushtarak, dhe ish ushtarakët kanë qenë e janë baza e kaherëshme ku Partia Socialiste është mbështetur edhe në situatat më të vështira të jetës së saj politike dhe në vitet më të vështira për PS e mbarë vendin.

Mos na nënvlerësoni, mos na mendoni se jemi thjesht disa idealistë që mund të luani me ndjenjën tonë, duke e përdorur gjithnjë kartë rimbushëse për të fituar mandatet tuaja!

*Ish-ushtarak