Kryetarja e Delegacionit Shqiptar në Asamblenë Parlamentare të Këshillit të Europës, Valentina Leskaj mori pjesë në mbledhjen e Komitetit Politik të Asamblesë Parlamentare të KiE.
Në këtë mbledhje u zhvillua debati për zbatimin e Rezolutës për Kosovën 2094 të miratuar në muajin Janar të vitit 2016.
Leskaj në fjalën e saj vuri theksin tek progresi i bërë nga pala Kosovare në përmbushjen e rezolutës duke shtuar se bollkimi i bërë nga pala serbe nuk e ndihmon dialogun.
“Kuvendi i Kosovës e ka kryer detyrën e tij në këtë aspekt, duke caktuar një delegacion, në përputhje me kërkesat e Asamblesë, të përbërë nga përfaqësues të mazhorancës, të opozitës dhe nga minoritetet, si dhe duke respektuar balancën gjinore dhe ka treguar vullnet të qartë për bashkëpunim me Këshillin dhe Institucionet e tij si Komisioni i Venecias. Natyrisht miratimi i delegacionit, pjesëmarrja në veprimtarinë e komiteteve, marrja e fjalës në to, është e rëndësishme po ndërkohë, një vit pas miratimit të rezolutës, delegacionit kosovar ende nuk i janë përcaktuar vendet sipas standardit të një delegacioni dhe e drejta e fjalës në aulën kryesore”,- ka theksuar Leskajn.
Në vijim të diskutimit të saj, Kryetarja e Delegacionit shqiptar në KiE vuri në dukje nevojën e dialogut ndërmjet Kosovës dhe Serbisë, duke nënvizuar se gjuha e ndarjes, e përjashtimit të tjetrit nuk e ndihmon avancimin e dialogut dhe bllokimi i situatës nga njëra pale siç po bën këtu pala serbe, nuk e ndihmon dialogun. “Të bllokosh situatën nga njëra pale siç po bën këtu pala serbe, nuk e ndihmon dialogun. Gjuha e ndarjes, e përjashtimit të tjetrit nuk ndihmon. Kjo nuk është gjuha e Këshillit të Europës. Nga ana tjetër, unë besoj se kjo situatë ku vetëm njëra pale mund të flasë, nuk është e mire për Kosovën, nuk është e mire për Serbinë dhe nuk është e mire për gjithë rajonin. Dhe besoj nuk është e mirë as për ne këtu në Asamblenë e Këshillit të Evropës. Përfaqësuesi i minoritetit është pjesë e delegacionit. Në se jeni të interesuar për të drejtat e minoritetit, siç pretendoni, jepuni atyre të drejtën të flasin këtu në Asamble”,- nënvizoi ndër të tjera Leskaj.
Duke e konsideruar Këshillin e Evropës si organizatën avantguard në promovimin e lirisë së fjalës, znj. Leskaj në diskutimin e saj kërkoi nga KiE që këtë liri fjale t’ia jap edhe delegacionit Kosovar. “Asambleja Parlamentare e Këshillit të Evropës është krenare për statusin e saj si shtëpia e të zgjedhurve nga e gjithë hapësira pan-evropiane. Dhe në fakt është organizata avantguardë në promovimin e lirisë së fjalës, ndaj nuk mund t’i mohojë një delegacioni vendin në sallën plenare dhe të drejtën e fjalës pse e kërkon Serbia”,- theksoi Leskaj./a.m.