Kuvendi i Shqipërisë është i gatshëm të mbështesë Komisionerin për të Drejtën e Informimit edhe përmes përmirësimit të legjislacionit në këtë fushë, u shpreh te premten nënkryetarja e Kuvendit, Valentina Leskaj,sot gjatë punimeve të Konferencës Kombëtare për të Drejtën e Informimit.
Ndonëse ligji për këtë qëllim ka mbi 18 muaj është miratuar nga parlamenti, sërish kjo e lë të hapur mundësinë për përmirësimin e mëtejshëm të tij.
“Ligji i ri, i mbështetur në praktikën ndërkombëtare, ka krijuar mundësi për një qasje të re dhe të hapur, por dhe për rritje të përgjegjësisë personale të zyrtarëve publikë në procesin vendimmarrës”, theksoi Leskaj.
Duke e vlerësuar ligjin në fjalë një instrument efektiv në zbatimin e të drejtave të qytetarëve, nenkryetarja e Kuvendit tha se puna e Komisionerit gjatë 18 muajve është tregues i besimit në rritje të tyre. Megjithate, nenvizoi ajo, zbatimi i ketij ligji konsiderohet një sfidë për Shqipërinë, pasi me rëndësi është ndërgjegjësimi i qytetarëve, shoqërisë civile dhe medias në ushtrimin e së drejtës për informim, që është thelbësore për një demokraci funksionale.
Rezoluta e miratuar një javë më parë për veprimtarinë e Komisionerit gjatë vitit 2015, vlerëson punën e këtij institucioni në ngritjen e një sistemi funksional në zbatimin e ligjit në fjalë, përmes ngritjes së programeve të transparencës.
Rezoluta e Kuvendit konstaton se gjatë 2015-s Zyra e Komisionerit, ka trajtuar një numër të konsiderueshëm ankesash në të dy fushat që mbulon, të drejtën e informimit dhe mbrojtjen e të dhënave personale.
Nenkryetarja Leskaj vlerësoi punën e bërë nga Komisioneri, që sipas saj, ka operuar në një terren ku nuk ka një traditë dhe kulturë të konsoliduar për një hapje të institucioneve. Zbatimi i ligjit për të drejtën e informimit synon që çdo qytetar të ndihet i vlerësuar dhe i dobishëm për këtë të drejtë, që ia jep Kushtetuta, theksoi ajo.
