NGA ARTUR AJAZI
Nuk ka ngjarje apo diçka të ngjashme me ngjarjen, ku “populli ynë trim, punëtor dhe liridashës”, të mos bëhet kurioz, të mos futë hundët, të mos japë mendimin, dhe të mos bëjë analizën e tij. Gjithmonë ka ndodhur kjo, edhe me drejtësinë.
Qysh në kohën e Zogut, Enverit, dhe tash në “dhemokraci”, populli ynë, gjithmonë ndodhet “pranë” ngjarjeve dhe ndodhirave. Jep mendimin e tij për mbretin, oborrtarët, arrestimet, marrëveshjet, dënimet, gjykimet, ka dhënë dhe jep mendimin e tij, për arrestimin e ndonjë deputeti, drejtori, ministri, apo dhe ish-kryeministri. Jep mendimin e tij “analitik”, për ngjarjet e ndodhura në Ballkan, Rusi, Irak, Burundi, madje deri në planetin Mars. Por gjëja kryesore që “populli ynë heroik” nuk harron, mbetet drejtësia.
Që herët, komentohej arrestimi ndonjë hajduti xhepash, apo ndonjë vrasësi, i bëhej biografia, i diheshin bëmat, dashnoret, dhe menyja e tij, e të ushqyerit. Pastaj merreshin me prokurorin, gjyqtarin, gardianin e burgut, etj. Kjo palo epidemi, ka prekur sot edhe shumë nga “gazetarët dhe hanalistët”. Ata merren ditë e natë, me arrestimin, me ndjekjen penale, i bëjnë aktakuzën ministrit, zv.ministrit, kryeministrit, presidentit. O popull, ku po shkoni?
Në Europën që duam të vemi ne, nuk njohin komshiun, ministrin, pale kryeministrin, pasi atje merren me punët, hallet dhe problemet e tyre. Shohin cakun dhe detyrat funksionale të profesionit të tyre, dhe e kanë për fyerje, të komentojnë dhe analizojnë çdo fenomen që ndodh në qeveri, aq më keq, të paragjykojnë prokurorin dhe gjyqtarin. Mbushen faqet e portaleve dhe gazetave print, me shkrime ku i bëhet “gjyqi” prokurorit, gjyqtarit, SPAK-ut, GJKKO-së, kryeministrit, presidentit, pale ministrave e deputetëve. Të gjithë janë kthyer në “prokurorë , gjyqtarë e analistë”.
Ulen dhe shkruajnë dhjetra e qindra rreshta mbi “ngjarjet e fundit”, i drejtohen SPAK-ut dhe GJKKO-së me ultimatum dhe proregativa, a thua se , janë kompetentë të drejtësisë, hetimit dhe gjykimit penal. Ndaj, lereni drejtësinë të qetë, hiqni nga fjalori dhe mëndja juaj, idenë dhe iluzionet e kota, se “duhet të merreni patjater” edhe me drejtësinë. Drejtësia është e vetmja fushë, ku flet ligji dhe hesht individi- ka thënë Franc Hosneberg. Mjafton ti referohemi mëndjeve të ndritura që bënë Europën të Bashkuar, që seicili të bëjë dhe shohë punën ë tij, për të ecur përpara.
