Nga Mero Baze
Sali Berisha më në fund u dorëzua. Ai pranoi sot publikisht atë që i kërkova në shkrimin e djeshëm, të deklarohet nëse e ka takuar Almën para dhe pas rregjistrimit të Safetit. E pranoi që e ka takuar, por nuk pranon të bëjë publike bisedën me të. Arsyeja është e thjeshtë. Ai shpreson tek heshtja e Almës, por nga ana tjetër ka frikë vesin e Almës se mund ta ketë rregjistruar dhe atë bisedë dhe tani mund të jetë në duart e drejtësisë.
Ndaj nuk do të flasë dhe mirë bën. Ndoshta ka fat dhe nuk ja përdorin, duke pasur parasysh zemërgjerësinë e drejtësisë sonë me të.
Por gjëja më interesante është përpjekja e tij për t’ia hedhur përgjegjësinë e publikimit “një televizioni lëpirës të qeverisë”.
Ky në fakt është i gjithë shpjegimi i ligësisë që Berisha ka bërë edhe me Almën, edhe me Safetin, por mbi të gjitha me përpjekjen e tij për të hedhur gurin dhe për të fshehur dorën.
Tani është e provueshme së paku dinamika e lëvizjeve të Almës, kontaktet e saj dhe përfundimi i videos në publik.
Alma ka takuar Sali Berishën para dhe pas takimit me Safetin në datën 6 qershor. Ka shumë sms në telefona të tjerë, miq dhe të njohur të Almës, që e provojnë këtë, plus vetë telefoni i Almës, që është një thesar në këtë drejtim.
Pasi ka përfunduar regjistrimin, tutori i saj në Kukës, A.U, i ka marrë filmimin për të verifikuar nëse e kishte bërë punën që i kishte ngarkuar apo jo. Dhe ja ka mbajtur peng.
Pas kësaj ajo shkon takon Sali Berishën më 9 qershor, në përpjekje për ta marrë filmimin nga ky person dhe për të shmangur publikimin në media.
Berisha i ka rekomanduar ta çojë tek një emision investigativ, me qëllim që të jenë ata burimi publik i përhapjes, edhe pse ka qenë i qartë që ata nuk do ta publikojnë se janë “afër qeverisë”.
Pas disa ditësh kërkesash dhe vetëm pasi e ka kërcënuar personin në Kukës se nëse nuk ja kthen kartën e memories, ajo do ta denoncojë atë si porositës të shantazhit, ai ja dërgon me njerëz të tjerë. Kjo vërtetohet nga biseda telefonike që gazeta TemA e ka botuar si transkript, dhe që i përket datës 15 qershor në mesditë. Pra karta e memories ka mbërritur në dorë të Almës më 15 qershor dhe më 16 qershor paradite ka dalë në publik, jo versioni i kartës që ka Alma dhe që ka dorëzuar tek emisioni, por një filmim mbi ekran që e ka bërë personi i cili ka shpërndarë videon dhe që ua ka dhënë disa vetave para se të bëhej publike. Madje njerëzit e tij kanë kërcënuar Safetin, duke e shantazhuar se nuk do të jetë më kryetar bashkie.
Emisioni që ka marrë videon nuk ka pranuar ta transmetojë as pjesën seksuale, por as aktrimin e Almës që bën sikur kërkon projekt për qentë e rrugës, pasi aty jep emër tjetër dhe nuk ka asnjë letër reale si projekt. Thjesht e ka quajtur të pavlefshme.
Personi që ka mbikëqyrur gjithë këtë proces është Sali Berisha dhe atij i duhej dorëzimi në një redaksi që të thoshte pikërisht këtë që tha sot, alibinë që ai nuk e ka nxjerrë videon, por e kanë nxjerrë “lëpirësit e qeverisë”.
E vërteta e hidhur për Berishën është se në këtë histori ka vetëm “lëpirës të Almës”.
I pari, Safeti, e pagoi shtrenjte lëpirjen me të, dhe është në burg. Por ata që vazhdojnë t’i lëpihen Almës se mos u nxjerr deri në fund skemën e shantazhit, janë Sali Berisha dhe njeriu i tij në Kukës. Berisha ngjan i terrorizuar sa nuk guxon as të thotë çfarë ka biseduar me Almën, pikërisht nga frika se e para nuk di a do t’i qëndrojë “besës” Alma, pasi këta i kanë paguar vetëm lekët e naftës për të shkuar në Kukës, dhe e dyta, a i ka rregjistruar Alma gjithë takimet në zyrë me Berishën.
Se dhe Safeti për kaq e hëngri, se e ka takuar në zyrë dhe zyra e Bashkisë së Kukësit nuk është më e rëndësishme se zyra e një kryetari opozite. Thjesht lëpirësi i Almës, Sali Berisha, është në panik mos shqiptarët dëgjojnë a shikojnë çka bërë në atë zyrë me Almën.
Skenari më pozitiv është që të dalë si ata pleqtë që përgjojnë çifte nga liqeni. Kjo dhe i falet. Të tjerat nuk di a ja fal njeri.
