Nga Blerina Karagjozi
Në lëkurë qëndron ajo që i tregojmë botës. A jemi lëkurë të vërteta apo të gënjeshtërta, të zakonshme apo të veçanta, të shtrenjta apo të lira. Disa të këshillojnë të kesh një lekurë të trashë për të mos lejuar shqetësimet të depërtojnë në të por a është vërtet ajo që duhet?
Në këtë botë ku dhe lëkura ka një çmim. E shëmtuar kjo që thashë.
Nuk është zhgënjim, as mendim, është një konstatim në tentativë. E shëmtuar ajo që po mendoj. Më e shëmtuar se ajo që shkruajta gjithsesi. Por sot dëshiroj të mbetem tek lëkura.
Lëkura. Prej të cilës ëndërrojmë të arratisemi për të qenë të lirë, për të qenë të vërtetë, për të jetuar ashtu si nuk mundemi e aq shumë duam.
Në lëkurë qëndron imazhi për të cilin ndodh të jetojmë. Atë jetën e mirëpranuar nga të tjera lëkura të shtirura më shumë se e të tjerëve, të cilët nëse nuk jetojnë për imazhin, sërish për të vlerësojnë, çmojnë, venë një etiketë ku nuk shkruhet por mund edhe të shkruhej çmimi por jo vlera…
Vlera e asaj që zgjedhim të kemi, e të jemi. Pyetja e rradhës më pushton kokën, të jesh apo të kesh…
Të jesh një çantë lëkure, e bërë nga vetë lëkura jote? Lëkura që aq shumë na përfaqëson dhe na mbështjell. Për të na mbrojtur, për të na pasur, për të na fshehur, nga të gjitha përveç vetes. E ende ndodh që vetja është rreziku i përhershëm që i kanoset vetë lekurës së vetes.
Më mirë të kesh një zemër të fortë, e nëse nuk e ke, mund të kesh një lëkurë si një çantë për të futur zemrën.
Të kesh një çantë lëkure për t’u ofruar të tjerëve një vend ku të mbartin ëndrrat. Sepse nëse nuk do të ndjekësh ëndrrën tënde rrezikon të të marrin për të plotësuar ëndrrën e dikujt tjetër.
E në këtë vend nuk ka rëndësi nëse je çantë apo trastë, rëndësi ka të kesh ngjyrën e duhur prej të cilës të mund të të shquajnë, e të të grupojnë. Në fund të ditës ndjesia e të qenit në qendër të shënjestrës nuk është dhe aq e këndshme.
E megjithatë është e vërtetë e jo një ndjenje e rrejshme. Sepse vetë ti nuk je një gënjeshtër, je një realitet për t’u gëzuar dhe jetuar deri në fund, brenda lëkurës, brenda moralit.
Sepse morali është moral, varet tërësisht nga njerëzit nëse e përdorin për mirë ose keq.
Mendoje këtë!
