Nuk do të ketë asnjë ngjyrë tjetër veç blusë mbretërore sot në Angli: ajo e cila prej së premtes ka pushtuar Leiçesterin, 160 km në veri të Londrës, duke ndriçuar Kullën e Krenarisë dhe katedralen e Shën Martinit, vitrinat e dyqaneve në Hambërston Gejt, dritaret e pabeve dhe rrugët e qytetit.
Dhe qyteti që ka veshur fanellën e skuadrës së futbollit është vetëm një hap larg lajmit që do të bëjë xhiron e botës.
“Kjo është historia, o sot, o kurrë”, thotë Klaudio Ranieri. Dhe vetëm 3 pikë larg tij, të vendosura sot në pjatën e “Old Trafford”, ai do të bëhet për një ditë trajneri më i pasur i botës, edhe pse merr vetëm rrogën e katërt më të ulët të Premier Ligës:
“Këtë herë dua një finale Hollivudi, me një fund të lumtur. Është e pabesueshme. Është historia përpara dhe ne e dimë këtë. Është e rëndësishme ta mbyllim këtë histori si një film amerikan. Të shkojmë deri në fund dhe të kemi një fund të lumtur. Është një shans i mirë, por për këtë arsye duhet të jemi të përqendruar. Më lejoni të jem i qetë, kemi kohë. U thashë lojtarëve: ‘Gjithçka është në duart tona dhe duhet të vazhdojmë’. Të tjerët mund ta shijojnë, por unë ende jo. Jam totalisht i përqendruar”.
Natyrisht që të përballesh me 20 herë kampionët e Anglisë nuk mund të kesh statistika superiore. Tri nga 6 fitoret e Leiçester Sitit në “Teatrin e Ëndrrave” kanë ardhur përpara Luftës II Botërore. Triumfi i tyre i fundit ndaj “djajve” ka ardhur në janar 1998, kur Toni Koti shënonte të vetmin gol të ndeshjes. Por ekipi i Van Galit i ka fituar të 6-ta ndeshjet e fundit në kampionat dhe kupë në “Old Trafford”, madje duke pësuar vetëm një gol.
Statistikat
Në këto momente, çdo burrë, grua dhe fëmijë në Britani e di që “dhelprat” janë pranë triumfit më shokues në historinë e Premier Ligës. Koeficienti 5000 në fillim të sezonit se ata do të fitonin titullin i thotë të gjitha për skuadrën që po shpallet kampione për herë të parë në historinë 132- vjeçare të klubit.
Që të kuptojmë se sa e papritur është kjo përrallë, kaq pranë epilogut të saj, u hedhim një sy edhe statistikave të 10 kampioneve të fundit të Premier Ligës, duke nxjerrë një mesatare. Dhe diferencat e tyre me Leiçesterin janë mahnitëse. E nisim me pasimet: 353 pasime mesatarisht të “dhelprave” për ndeshje këtë sezon, 512 mesatarja e kampioneve të Premier Ligës: 43% me 58% zotërimi i topit, 10.1- 13.4 mesatarja e goditjeve drejt portës, 1.8-2.1 mesatarja e golave për ndeshje, 0.94- 0.85 mesatarja e golave të pësuar për ndeshje.
E megjithatë, statistikat e mbrojtjes së Ranierit janë më të mira se ato të 7 kampioneve nga 22 të Premier Ligës. Por Mister Ranieri do të përgjigjej se ka vetëm një statistikë që ka me të vërtetë rëndësi: klasifikimi. Dhe sot në Mançester, ata vijnë 7 pikë përpara Totenhemit të vendit të dytë në 3 ndeshjet e mbetura. Apo jo, Klaudio?Panorama Sport
Javanews/ a.k
