Epidemiologu Alban Ylli, në një lidhje direkte me “Ditari” në A2, deklaroi se pavarësisht lehtësimit të masave nga Komiteti Teknik, “ende kemi plot të dhëna që tregojnë se virusi vijon të përbëjë rrezik potencial”, duke shtuar se vetëm vaksinimi masiv do të na përgatisë për një rikthim të mundshëm të Covid-19 në dimër.
“Duke parë situatën globale dhe sjelljen e virusit, ende kemi plot të dhëna që tregojnë se virusi vijon të përbëjë rrezik potencial. Mesazhi për popullatën është që të rrijë e qetë, por të vazhdojë të ruajë distancën sociale dhe të shmangë grumbullimet.
Masat që po lirohen janë reagimi i duhur për jetën e qytetarëve. Vera do të jetë e qetë, mendoj se nuk do të ketë probleme në periudhën afatshkurtër. Unë mendoj se, duke qenë se prirja e infektimeve nuk po bie në vendet ku po afrohet dimri, në terma afatgjatë situata do të varet shumë nga vaksinimi masiv i popullatës”, deklaroi Ylli.
“Duhet të mendojmë për 2 milionë vaksinime brenda vitit që të jemi të sigurtë. Variantet e reja dhe stina e dimrit janë elementë që rrisin rrezikun”, shtoi Ylli.
Sipas Yllit, “vaksinimi duhet të jetë strategjia bazë dhe më e madhe për të përballuar atë që ka ngelur nga pandemia. Distancimi social është masë shtesë. Tashmë, fokusi duhet të jetë te vaksinimi”.
/b.h
