ALUIZNI përfundoi procesin e legalizimit për panorët e një tjetër pallati, të braktisur nga investitori. Banorët, të ndodhur në kushtet e moseksiztencës së ndërtuesit, kanë filluar vetë procedurat për legalizimin e apartamenteve të tyre. Në bashkëpunim me Drejtorinë Tirana 2, ata kanë bërë të mundur përfundimin e procedurave dhe pajisjen me Certifikatë Pronësie në emër të banorëve.
Drejtori i Përgjithshëm Artan Lame gjeti rasti të ribëjë thirrje për të gjithë banorët, në rastet kur ndërtuesi braktis objektin, që të bëhen bashkë për të arritur përmbylljen e procesit.
“E kam thënë sa herë me jepet dhe rasti se të gjithë banorët që i futen procedurës së legalizimit të një pallati, duhet të bëhen bashkë për plotësimin e dokumentacionit që i vihet në dispozicion ALUIZNI-t. Duhen të jeni bashkë që procedura të mbyllet shpejt dhe gjithësecili që ka investuar të jetojë i qetë në shtëpinë e tyre. ALUIZNI nuk mund të jetë produktiv, nëse qytetarët nuk do të jenë bashkëpunues. Duhet të jeni bashkë që gjithçka të përfundojë shpejt dhe ti jepet fund makthit disa vjeçar” tha Lame.
Lame theksoi se ”Me hyrjen në fuqi të Ligjit për Kadastrën, fillon sfida e madhe e Qeverisë shqiptare për të reformuar gjithë sistemin e rregjistrimit të pronës”.
Procesi i legalizimit të pallateve të braktisura, konsiderohet si një prej proceseve më të komplikuara pronësore, për shkak të shtrirjes në kohë të fenomenit, të konflikteve të trashëguara mes pronarëve të trojeve, të ndërtuesve dhe vetë banorëve, për shkak të mungesës së dokumentacionit, të mosmarrëveshjeve mes vetë banorëve, etj.
Megjithatë, sipas ALUIZNI-t falë impenjimit të strukturave dhe bashkëpunimit të banorëve, deri tani vetëm në Tiranë është bërë e mundur të legalizohen rreth 140 pallate të tilla me rreth 860.000 m2 ndërtim dhe 10.400 apartamente dhe njësi shërbimi.
