Ish-deputetja socialiste Ledi Shamku me profesion pedagoge në Universitetin e Bolonjës, i është përgjigjur ministrit të Brendshëm italian, Matteo Salvini, i cili tha dje se kishte marrë një letër kërcënuese nga shqiptarë.
Salvini shkruante dje në Twitter, se kërcënimi më i madh ishte për gramatikën italiane, duke ironizuar se letra ishte shkruar keq nga shqiptarët që ‘kërkonin’ t’a vrisnin.
Por duket se ish-deputetja socialiste ka qenë e vëmendshme ndaj mënyrës sesi është shkruar kjo letër dhe i rendit Salvinit, arsyet pse sipas saj, kjo letër nuk është shkruar nga shqiptarë. Ajo thotë se një shqiptar nuk e ka në shprehi, as kur është i zemëruar as kur mallkon të thotë: Derr me brirë!
“Një shqiptar i zemëruar nuk do të kishte shkruar “derr me brirë”. Jo i dashur, këto nuk janë shprehjet tona lokale, “metafora derr me brirë” nuk është shqiptare, nuk është pjesë e gjuhës sonë. Kjo letër është shumë italiane, i dashur.”-shkruan Shamku.
Më tej, me nota humori, Shamku thotë se kjo letër sado e shkruar keq nuk mund të ndikojë tek marrëdhëniet Shqipëri-Itali.
“ Nuk do të jetë një letër e botuar në mënyrë të papërgjegjshme për të shqetësuar një bashkëjetesë prej dy mijë vjetësh dhe kalon mes dy popujve. Jo definitivisht! Unë do t’ju këshilloja të lexoni pak më shumë rreth Sociolinguistikës. Është një disiplinë që e bën njeriun më të mirë se sa është”, shkruan Shamku.
/b.d
