Dasma e djalit të pronarit të “Ora News”, Ylli Ndroqit, mblodhi 600 të ftuarit VIP në Pallatin e Kongreseve, që për herë të parë hapi dyert për një veprimtari të tillë. Në ceremoninë e së shtunës së Redon dhe Mariam Ndroqit, nuk munguan çiftet e zyrtarizuar, por edhe ata të rinj që kishin rezervuar këtë dasmë madhështore për të dalë hapur në njëfarë mënyre pas një lidhjeje të fshehtë.
Çifti më i ri që kanë pozuar para banerit me Ylli & Mimoza Ndroqin ishin ish-zëdhënësja e Partisë Demokratike, Laura Vorpsi, sot koordinatore, dhe biznesmeni i njohur, Theodhor Çami. Që pas largimit si zëdhënëse e PD-së, Laura i ka pasur të rralla daljet e saj publike, dhe kjo është hera e parë që ajo shfaqet dhe me veshje mondane, një fustan në ngjyrën e gjelbër rrëzëllitëse. Stilit të saj i është përshtatur dhe Teo, i cili ra në sy për kombinimin shik me kravatën dhe kë- pucët, në nuancat e ngjyrës së fustanit të Laurës.
Sipas mediave të ndryshme, Laura Vorpsi e ka mbajtur larg vëmendjes jo vetëm jetën e saj publike, por edhe lidhjen me biznesmenin Theodhoro Çami, me të cilin pavarësisht se është fotografuar për herë të parë në këtë dasmë, flitet se është një histori që nisi para një viti. Sipas miqve të tyre, ata filluan të frekuentoheshin që pas kthimit të Laurës nga Gjermania vitin e kaluar, ku shkoi për një stazh pranë partisë së Kancelares Angela Merkel (CDU).
Disa vite më parë ishzëdhënësja e PD-së konsiderohej si nga zyrtaret më seksi dhe të bukura të asaj kohe, prezenca mediatike e së cilës shoqërohej me shkrime në faqet e shtypit rozë sa i takon jetës private, stilit të jetës, apo miqësive të saj me njerëz të rëndësishëm, me të cilët shfaqej në publik. Po kush është Teo në krah të saj, për të cilin miqtë e tyre të përbashkët thonë se Laura është në një lidhje të konsoliduar?
Ai është pronar i televizionit “In” në Shqipëri, i kompanisë “Universal Albanian Media” dhe i një agjencie të njohur publicitare, “Le Spot Group”. Në Tiranë ai njihet për miqësitë me vajza të njohura dhe të bukura të ekranit, por asnjëherë nuk është marrë vesh nëse ka pasur thjesht shoqëri apo diç- ka më shumë me ndonjërën prej tyre. Sa për Laurën, mesa duket njerëzit e tyre më të afërt janë në dijeni që ata kanë një marrëdhënie të konsoliduar, përderisa ftesat u shkojnë çift. Përveç punës si pedagoge pranë Fakultetit të Drejtësisë, 29-vjeçarja duket se po i dedikohet jetës private.
Ajo po flitet për këtë histori të re, tri vite pas ndarjes nga ish-Mr. Albania, Gerald Shahu. U fol në atë kohë se patën një ndarje konfliktuale pas disa vitesh fejesë, për të cilën nuk pranuan të flisnin në media as njëri dhe as tjetri.
ÇFARË MENDON LAURA PËR BURRIN IDEAL, PARANË DHE MARTESËN
Gjatë karrierës së saj si zëdhënëse e PD-së, Laura Vorpsi ishte në qendër të vë- mendjes mediatike jo vetëm si femër interesante në prezencën e saj, por edhe çfarë këndvështrimi ka ajo për jetën. Në një nga intervistat e saj për gazetën “Panorama”, Laura ka folur për burrin ideal, paratë dhe martesën.
Pyetjes se cili është imazhi i saj për burrërinë e një mashkulli, ajo i është përgjigjur: “Nëse flasim për imazh, do të thoja Bruce Willis”. Ndërsa sa i takon planit për martesë e për të krijuar familje dhe si do të ndikonte familja në jetën e një politikaneje, ajo shprehej: “Mënyra se si jam rritur më ka mësuar të vlerësoj familjen si gjënë më të shtrenjtë dhe më të dashur që Zoti i ka dhuruar njeriut.
Kurdo që vullneti i Zotit të vijë tek unë për krijimin e një familjeje, do të jem krahëhapur dhe falënderuese për atë bekim. Mendoj që familja luan rol kryesor në jetën e çdo politikani, në përgjegjshmërinë dhe përkushtimin e tij në punët e përditshme.
Sa i takon pushtetit politik, ajo thotë se: “Pushteti për mua nuk është qëllim në vetvete, por është mjet për të influencuar në përmirësimin e gjendjes së vendit tim dhe për të luftuar padrejtësitë. Nëse do të kisha pushtet të ndryshoja një element të vetëm në këtë vend, do ta nisja nga padrejtësia çerek shekullore e pronave”. Ajo nuk heziton të flasë për vlerën e parasë në jetë, të cilat i konsideron “të nevojshme”.
Nuk ka hezituar të flasë rreth kujdesit për pamjen dhe hobet jashtë politikës, duke thënë: “Nuk bëj asgjë përveçse rutinës normale, që është besoj e njëjtë për çdo femër. Jashtë politikës parapëlqej artin, veçanërisht pikturën dhe pianon. Sa herë që gjej mundësinë dhe kohën e lirë, jam duke shijuar një koncert në TKOB, zakonisht më tim atë. Pjesa e udhëtimeve jashtë vendit jo vetëm për ‘shopping’, siç e quajmë në ‘slang’, është një tjetër kënaqësi, të cilën e ndaj gjithmonë me mamanë time”.
Panorama/d.i.
