Qeveria italiane ka dëbuar dy atashe ushtarakë që shërbenin në Ambasadën Ruse në Itali. Lajmin e bëri të ditur ministri i Jashtëm italian, Antonio Tajani, përmes një postimi në rrjetet sociale, duke bërë me dije se dy zyrtarët janë identifikuar në kuadër të hetimeve të Prokurorisë së Romës si përgjegjës për veprimtari spiunazhi.
Pas përplasjes së fortë diplomatike me Kremlinin, ambasadori rus në Romë u thirr në Ministrinë e Jashtme italiane.
“Sekretari i Përgjithshëm i Ministrisë së Jashtme sapo i ka komunikuar ambasadorit rus në Romë se Ivan Petrovich Gorbachev dhe Mikhail Vasilyevich Astakhov duhet të largohen nga Roma brenda tre ditësh”, shkroi Tajani.
“Moska vazhdon të përdorë armët e saj hibride për të sulmuar Perëndimin dhe Italinë. Kjo është një ndërhyrje e rëndë dhe e papranueshme ndaj institucioneve italiane dhe sigurisë sonë kombëtare”, shtoi ai.
Reagimi i Rusisë: Do të përgjigjemi. Italia nuk ka udhëheqës të nivelit të Putinit
Ministria e Jashtme ruse reagoi menjëherë pas vendimit të Romës, duke deklaruar se Moska do të “përgjigjet në mënyrën e duhur” ndaj dëbimit të dy diplomatëve. Lajmi u raportua nga agjencia ruse RIA Novosti, pa u dhënë detaje mbi masat që pritet të ndërmerren.
Deklaratave të Ministrisë së Jashtme ruse iu bashkua edhe ambasadori rus në Itali, Alexei Paramonov, i cili përmes kanalit të tij në Telegram akuzoi autoritetet italiane se, duke dëbuar sa më shumë diplomatë rusë, synojnë të kufizojnë ndikimin e Rusisë në Itali.
Sipas tij, kjo është e pamundur, pasi “Rusia ka personalitete të kalibrit të Vladimir Putinit dhe Sergei Lavrov. Italia, përkundrazi, megjithëse ka një potencial të jashtëzakonshëm në aspektin e ideve dhe një trashëgimi të pasur politike e humaniste, sot nuk ka figura të një niveli të tillë”.
Ndërsa po largohej nga Ministria e Jashtme, Paramonov ironizoi takimin duke deklaruar: “Ndryshe nga shumë vende të tjera në Romë që më ndodh t’i frekuentoj, këtu në Farnesina, si gjithmonë, nuk ndodh asgjë e mirë.”
Tajani: Hakmarrje absurde nga Moska
Ministri i Jashtëm italian, Antonio Tajani, iu përgjigj deklaratave të Moskës, duke i cilësuar ato si një “hakmarrje absurde”.
“Problemi është se dy personat e dëbuar nga Italia kryenin aktivitet spiunazhi në dëm të sigurisë sonë kombëtare dhe kjo është e provuar”, deklaroi ai.
“Ata nuk u dëbuan për një tekë të Italisë. Ekzistojnë video, fotografi dhe pamje që e vërtetojnë. Bëhet fjalë për dy spiunë që korruptonin persona dhe për këtë arsye nuk mund të qëndrojnë në Itali. Rusia mund të ndërmarrë çfarëdo kundërpërgjigjeje, por ajo do të jetë një akt hakmarrjeje dhe jo një masë për mbrojtjen e sigurisë së saj. Nëse vendos të dëbojë diplomatë italianë, duhet të provojë se ata janë spiunë. Ne kemi dëbuar dy spiunë mbi bazën e fakteve, ndërsa çdo vendim i tyre do të ishte thjesht politik dhe i pabazuar”, u shpreh Tajani.
