Koalicioni “Nisma-Shqipëria Bëhet” ka prezantuar kandidatët e saj në zgjedhjet parlamentare të 11 majit. Në fjalën e tij, bashkëkryetari i koalicionit Adriatik Lapaj tha se të gjithë kandidatët do të jenë në listat e hapura.
“Jemi krenarë që përtej baltës, ja kemi dalë të krijojmë një kohezion dhe të kandidojmë kandidatë që kanë pranuar të garojnë në lista të hapura. Në këto zgjedhje ne do të jemi një subjekt politik ku listat e mbyllura të politikës së vjetër i kemi djegur e ku po hapim një dritare të re shprese për të garuar më në fund shqiptarët si njerëz normalë të një vendi normal. Është betejë e vështirë, por qytetarët e vendit tonë s’kanë rrugë tjetër veçse ta fitojnë dhe ne kemi hyrë në këtë rrugë për ta çarë sistemin si fillim dhe mandej poër ta shembur për të bërë ndryshimin e madh historik”, tha Lapaj.
Duke iu drejtuar kandidatëve, Lapaj tha se “do të synojnë t’u intimidojnë, kërcënojnë apo blejnë nga ana tjetër, por ata duhet të mendojnë cdo mëngjes, nëse e meriton më populli ynë të shitet dhe të tradhëtohet?”
Ai tha se duhet të qëndrojnë të fortë, për ta carë sistemin që ka marrë peng Shqipërinë, dhe se kjo është detyrë kombëtare.
