Presidenti i Bundestagut gjerman, Norbert Lammert, gjatë fjalës së tij në Kuvend, ka kujtuar vitin 1967, kur Gjermania Perëndimore, nënkampione e botës, eliminohej nga kampionati evropian pas barazimit pa gola me Shqipërinë në stadiumin kombëtar “Qemal Stafa”. Lammert e kujtoi atë si një ngjarje për të cilën ende përshkruhet si katastrofë në Gjermani, pasi është i vetmi rast kur kombëtarja gjermane ka dështuar të kualifikohet në fazën finale të një kompeticioni, përveç rasteve kur nuk ka marrë vetë pjesë ose ka qenë e dënuar nga FIFA (1950).
“Ende e kujtojmë atë eliminim. Tani, në finalet e europianit janë të dyja, edhe Gjermania, edhe Shqipëria. Sikur të ndesheshin bashkë në finale…”, tha Lambert.
Në përfundim të fjalës së tij, kryeparlamentari shqiptar, Ilir Meta, iu përgjigj me humor: “Urojmë që të dalin të dyja në finale dhe pastaj jam i bindur se asnjërit këtu nuk do t’i vijë keq, kushdo që ta fitojë atë ndeshje”.
