Ministri i Drejtësisë, Besfort Lamallari, gjatë raportimit mbi gjendjen e kriminalitetit për vitin 2024, prezantoi një sërë masash të ndërmarra për përmirësimin e infrastrukturës së institucioneve të drejtësisë në vend.
Ai u shpreh se në bashkëpunim me Këshillin e Lartë Gjyqësor, Prokurorinë e Përgjithshme, Prokurorinë e Apelit dhe Prokurorinë e Tiranës, ka përfunduar faza e projektimit për ndërtimin e një godine të re që do të akomodojë të gjitha këto institucione.
“Së bashku me KLGJ kemi kërkuar nga Ministria e Drejtësisë sigurimin e një sheshi ndërtimi për të vijuar me hartimin e projektit. Megjithatë, çështjet e terrenit dhe financimit mbeten ende të pazgjidhura, ndërkohë që nevoja për masa konkrete është tejet urgjente,” u shpreh ministri Lamallari.
Ministri njoftoi se gjatë vitit 2024 ka përfunduar me sukses rikonstruksioni i Prokurorisë Dibër, duke krijuar hapësira të mjaftueshme për funksionimin normal të institucionit. Për vitin 2025, ministri theksoi se janë planifikuar përfundimet e investimeve në prokuroritë Fier, Gjirokastër dhe Vlorë.
Ndalur te gjendja e kriminalitetit në vend, Ministri bëri me dije se viti 2024 ka shënuar një rritje me 12,32 % të numrit të procedimeve të regjistruara, krahasuar me një vit më parë. Lidhur me veprat e korrupsionit, Lamallari tha se janë regjistruar 569 procedime dhe një rritje prej 4,84% të të pandehurve të dënuar për vitin 2024, krahasuar me vitin 2023.
“Prokurorët kanë rritur rolin aktiv për veprat penale të korrupsionit dhe ato që lidhen me detyrën duke filluar kryesisht 19 procedime penale dhe në kryerjen e hetime proaktive, në 34 procedime penale. Ky proces ka çuar në arrestimin në flagrancë apo ndalimin e 25 personave të dyshuar për kryerjen e veprave penale në kompetencë të prokurorive pranë gjykatave të shkallës së parë me juridiksion të përgjithshëm”, u shpreh ministri.
Mbi 234 pasuri janë sekuestruar në total, që kapin vlerën e mbi 290 milion lekë dhe 48 milion euro. Ndërkohë, mbi 89 pasuri janë konfiskuar gjatë vitit 2024, me vlerë mbi 163 milion lekë.
