SPAK do të marrë në dorë hetimet për atentatin e bujshëm pranë aeroportit të Rinasit, më 11 nëntor 2025.
Siç raporton gazetari i Klan News, Besar Bajraktaraj, Prokuroria e Tiranës ia ka kaluar kompetencat Prokurorisë së Posaçme AntiKorrupsion pasi ngjarja është kryer në kuadër të grupit të strukturuar kriminal.
Kujtojmë se prej atentatit mafioz, mbeti i vrarë Gilmando Dani dhe Muçi Shaljani alias Sheqeri. Ky i fundit drejtonte makinën me të cilën lëvizte Gilmando Dani, i cili mbeti i vrarë në vend nga breshëria e plumbave të armëve të zjarrit.
Pamjet e atentatit, momenti kur autorët i zënë ‘pritë’ Benz-it:
Shaljani i cili rezultoi se ishte agjent i Agjencisë së Mbikëqyrjes Policore (AMP), ndërroi jetë në spital, disa ditë pas atentatit.
Aq shumë u qëllua në drejtim të makinës ku ndodheshin ata, sa plumbat dëmtuan edhe një hotel që ndodhej aty pranë.
Ndonëse mbeti viktimë e atentatit, Muçi Shaljani nuk ishte objektivi i vrasësve. Hetuesit dyshojnë se shënjestër ishte miku i tij, Gilmando Dani, me të cilin 40-vjeçari u qëllua sapo u kthyen nga një vizitë disa ditore në Barcelonë.
Theksojmë se Policia ende nuk ka të dhëna për autorët e vrasjes, teksa verifikimet i ka shtrirë edhe në Spanjë, ku dy viktimat ishin para ekzekutimit.
Informacion është kërkuar edhe nga autoritetet greke, nga ku rezultoi se ishte vjedhur makina tip Toyota e 4 autorëve, së bashku me targat, të cilat u dogjën në fshatin Halil pas ngjarjes.
Rreth 5 kilometra nga ky vend, policia gjeti dhe sekuestroi një arsenal armësh në banesën e Ylli Zallës nga Fushë-Kruja. Ndonëse ky i fundit po hetohet nëse ka lidhje me atentatin, burime pranë policisë dhe prokurorisë i komunikuan TV Klan më herët, se nuk ka deri më tani asnjë provë që implikon 48-vjeçarin në vrasjen e Gilmando Danit dhe mikut të tij, Muçi Shaljani.
