Lakrori me dy peta i pjekur në saç, i konsideruar si një prej gatimeve tradicionale korçare, për të nëntin vit radhazi është ofruar për shijuesit e kulinarisë përmes “Festës së lakrorit”.
Mbrëmja e 23 Korrikut mblodhi në fshatin Polenë të Korçës qindra qytetarë, vizitorë e turistë në këtë festë.
Gratë e qytetit dhe fshatit, të ndihmuara nga burrat, apo vajzat, të cilave u trashëgojnë këtë traditë, përgatitën një prej gatimeveë të veçanta korçare, duke u dhënë të pranishmëve mundësinë që jo vetëm ta shijojnë, por edhe ta shohin me sytë e tyre mënyrën e përgatitjes së tij.
Më tepër se 300 lakrorë u gatuan dhe u poqën mbrëmjen e së shtunës dhe më pas u tregtuan për qytetarë e turistë të shumtë që kishin mbërritur të shtunën në Korçë.
“Festa e lakrorit” e shndërruar në një traditë të përvitshme është sjellë si një paketë e Bashkisë së Korçës, për të promovuar traditën e kuzhinës korçare dhe për të gjallëruar verën.
“Festa e Lakrorit” nuk solli vetëm shije, por edhe argëtim, teksa mes tavolinave dhe shijimit të lakrorit nuk mungoi as muzika, përbërësi kryesor i çdo feste.
Kjo festë, ashtu si dhe ajo e birrës, synon që të zhvillojë më tej turizmin e fundjavës tani në periudhën e verës, ku Korça frekuentohet jo vetëm nga pushues të shumtë nga Shqipëria dhe vende të tjera, por sidomos edhe nga emigrantët e shumtë që rikthehen në vendlindje çdo vit.
ATSH/d.i.
