Në rrethojat e fushës stërvitore të RB Leipzigut, ka thënie inspiruese nga sportistët e mëdhenj. Në mesin e tyre një nga njeriu më i shpejtë në botë, xhamajkani Usain Bolt: “Kurrë mos i vendos vetes limite. Asgjë nuk është e pamundur.”
Mund të duket banale, por lojtarët duket se kanë marrë këto fjalë me zemër. Skuadra e ngritur në elitë për herë të parë këtë stinor, është duke ndarë kreun e renditjes së Bundesligës gjermane në futboll, shkruan Daily Mail.
Pas dhjetë ndeshjeve, RB Leipzig nuk ka pësuar ende humbje dhe ka 24 pikë. Zë vendin e dytë me pikë të barabarta me liderin Bayern Muenchen, por Bayerni ka goldallim më të mirë, përcjell Koha Ditore.
Është hera e parë në gjashtë vitet e fundit që një skuadër ka qenë e barabartë me pikë me Bayernin pas dhjetë xhirove. Po ashtu është seria më e gjatë pa humbje që një skuadër e ngjitur në elitë e kishte në start të stinorit të Bundesligës.. (b.an)
