Nga Ilva Tare
Sic është bërë e udhës pas publikimit të sondazhit në Ora News, nga drejtori italian Antonio Noto i IPR Marketing, të gjitha partitë mësyjnë sulme të organizuara për ta nxjerrë si të blerë ose shitur, apo të porositur nga një parti e vecantë. Problemi me sulmuesit është se të gjitha partitë janë të pakënaqura dhe opinioni publik e ka të vështirë të kuptojë se kush është porositësi.
Dhe është e kuptueshme që qytetarët që janë dhe votues në 25 Qershor janë më të prirur të besojnë një sondazh të pavarur dhe të realizuar nga një kompani profesionale dhe serioze e bazuar në Itali sesa nga t’u besojnë qëndrimeve politike të partive të caktuara, që në mes të fushatës elektorale ashtu sic bëjnë me premtimet fryjnë dhe shifrat e pritshëmrive për militantët e tyre.
Këto strategji zgjedhore janë të kuptueshme ndaj dhe sulmet futen në keqardhjen e sjelljes së motivuar politikisht, fenomen që njihet për nivelin e lartë të hipokrizisë dhe mashtrimit të opinionit publik. Disa prej sulmeve janë të pranueshme, të tjera jo etike, por meqenëse bëhen në një ambjent ku fjala kriminel është si fjalëkalim që hap e mbyll cdo bisedë, nuk merren seriozisht dhe meritojnë të injorohen.
Kështu ndodhi edhe me sondazhin e parë të publikuar në 31 Maj dhe me shumë gjasa orkestra e sulmuesve po stërvitet që të lëshojë të njëjtët tingull edhe në mbrëmjen e 7, 14, 19 Qershorit. U nxorrën tabela të vërteta dhe të sajuara që tentonin të vinin në dyshim vërtetësinë e rezultateve të dala nga sondazhet e viteve të mëparshme.
Studiuesit e shkencës së matjes së opinionit publik përmes sondazheve sugjerojnë që krahasimi i rezultatit përfundimtar të certifikuar nga Komisioni Qendror i Zgjedhjeve duhet të bëhet me Exit Poll-in e ditës së votimit dhe jo me sondazhet e kryera gjatë fushatës, të cilat janë më orientuese por tentojnë të ndryshojnë në varësi të efektit të fushatës.
Të gjitha partitë duan të fitojnë por IPR Marketing nuk e ka garën me to. Qëllimi i publikimit të sondazheve dhe Exit Poll-it është t’u tregojë qytetarëve përpara daljes së rezultatit zyrtar prirjen e votës dhe fituesin e zgjedhjeve. Ndërsa përqindja e saktë e fituesve dhe humbësve është detyrë e KQZ-së. Edhe mosbesimi i shprehur ndaj sondazheve në arenën ndërkombëtare sidomos për zgjedhjet në SHBA, nuk lidhej me përqindjen se sa parashikohej fitorja e Hillary Clinton, por pavarësisht se vota popullore i shkoi asaj, fitues për shkak të sistemit elektoral u shpall Donald Trump, që nuk dilte në sondazhe.
Në rastin e IPR Marketing në të gjitha sondazhet e kryera në Shqipëri për Ora News nuk ka ndodhur kurrë që mos të godasë në shenjë për fituesin e zgjedhjeve. Debatet që ushqejnë partitë politike në rrjetet sociale lidhen me përqindjen se sa afër ka qenë sondazhi me rezultatin përfundimtar, por jo me faktin nëse është gjetur fituesi i zgjedhjeve apo jo.
Gjithashtu partitë politike pretendojnë se kanë sondazhet e tyre me rezultate të ndryshme nga ato të sondazheve të publikuara nga IPR Marketing. Kjo mund të jetë e vërtetë. Por përderisa ata nuk duan t’i publikojnë, por i kanë për konsum të brendshëm nuk mund t’i ballafaqojnë me shifrat dalin publikisht në Ora News dhe ballafaqohen me publikun pas certifikimit të rezultatit zyrtar.
Në fund, kjo mbetet një iniciativë e lavdërueshme dhe e kushtueshme që ka për qëillim t’i shërbejë opinionit publik dhe audiencës së televizionit Ora News. Besueshmërinë që shqiptarët kanë krijuar në pothuajse dhjetë vvjet bashkëpunim me IPR Marketing mund ta sfidojë vetëm publiku shqiptar dhe jo partitë që janë në konflikt interesi me sondazhet e pavarura.
Ndaj, lajmi i mirë është që edhe këtë radhë partitë u rreshtuan ta sulmonin sondazhin, të gjitha në kor. Lajmi i keq për to është se 25 Qershori po afron dhe sic besoj edhe ata vetë e dinë po ashtu ua do puna ta thonë, në vend të parë të makinës do të ketë shansin të jetë vetëm një parti dhe nëse sondazhet parathonë votën që do të hidhet në kutitë e votimit, nuk është faji i makinës, por timonierëve që gënjejnë dhe veten e tyre.
