Të prekurit me koronavirus banojnë ne Tiranë dhe Durrës, por çfarë ndodh në Veri?
Lëvizjet në rrugë janë të pakta. Ndonjë bisedë e shtrëngim duarsh. Megjithatë, në dy ditët e para të Shqipërisë me koronavirus, në qytetin e Kukësit, banorët e kanë marrë lehtë.
Farmacitë nuk kanë maska të mjaftueshme, por edhe interesi i banorëve është i pakët. Disa shprehen se nuk kanë marrë maska apo dezinfektantë, megjithatë tregojnë siguri dhe qetësi.
Të tjerë qytetarë shprehen se kanë marrë masat e përcaktuara nga OBSH-ja, duke ruajtur higjienën apo duke marrë mjekimet e nevojshme. Ndërsa të tjerë nuk shprehin shqetësim apo frikë, madje nuk kursejnë as batutat.
“Jo hiç fare, pse të kem frikë. Ne raki e pimë, si të pimë raki jemi të mbrojtur. Lajmë duart, lajmë gurmazin edhe jemi në rregull.
Ne kemi kaluar gjithë këto kohë me grip, pse e bëjnë të rrezikshëm këtë, ku e di unë. Absolutisht nuk kam frikë, një ditë kam për të vdekur. Sapun e masat i kemi. S’kemi çfarë t’i bëjmë, kur ta shkruajë Allahu, nuk mund ta ndalim”, shprehet një nga qytetarët e Kukësit.
g.kosovari
