Nga Çapajev Gjokutaj
“Unë po eksportoj MAGA – Bëje Shqipërinë të madhe përsëri!”. Shoh që NYT citon këtë gjetje të Chris LaCivita, këshilltarit amerikan të PD për zgjedhjet e 11 majit.
Parë me sytë e një të huaji, që s’e di shqipen dhe nuk e njeh historinë e Shqipërisë, transformimi i slloganit të Trump ‘Make America great again’ në ‘Make Albania great again’ është gjetje e bukur dhe funksionale.
Gjithë militantëve të një partie do t’u pëlqente përqasja e Shqipërisë me Amerikën dhe e liderit të partisë së tyre me Donald Trump.
Gjithsesi kur e dëgjon këtë gjetje të shkon mendja se në shqip pranëvënia e emrit ‘Shqipëri’ me mbiemrin ‘e madhe’ krijon thuajse vetvetiu lidhje me nocionin politiko-historik ‘Shqipëri e Madhe’.
Thua ta dijë LaCivita ç’është kjo? Më tej akoma: a është në interesin e PD që, qoftë edhe në trajtë ambige, të krijojë përshtypjen se është për Shqipërinë etnike, sidomos tani që marrdhëniet e saj me ndërkombtarët nuk janë më të mirat?
Natyrisht, kur thotë ‘bëje Shqipërinë të madhe përsëri’ strategjisti amerikan nënkupton ‘bëje madhështore’.
Po edhe këtu lind një pyetje të cilës çdo shqiptar me mend nuk i kthen dot përgjigje: kur ka qenë Shqipëria e madhe në kuptimin e fortë, e begatë dhe e njësuar në një shtet?
Mbase s’e kish dhe aq keq i pari kur tha: s’mbahet shtëpia me miell hua.
