LAÇI – Laçi ka mbyllur përgatitjet për takimin e sotëm përballë Kukësit. Por kurbinasit vijojnë në heshtje për shtyp, me qëllim që ekipi të jetë sa më i fokusuar në këtë ndeshje delikate. Një fakt të tillë e konfirmoi për “Panorama Sport” vetë trajneri vlonjat, Gentjan Mezani. “Jemi në heshtje për shtyp.
Duam të jemi sa më të fokusuar te takimi në fushë, duke i lënë komentet para ndeshjes. Ju lutem, më mirëkuptoni”, u shpreh shkurtimisht Mezani.
Dy mungesa do të ketë Laçi për ndeshjen e sotme. Shtubina dhe Eskerda nuk do të jenë të gatshëm. Ky i fundit vijon të jetë i dëmtuar, ndërkohë që shkodrani për shkak të vendimit të Disiplinës. Hyrja falas.
KUKËSI – Trajneri Pakult e zhvendosi seancën stërvitore në mesditë. Ekipi filloi në orën 15:30 stërvitjen, e cila zgjati një orë e 30 minuta. Tekniku austriak u kërkoi futbollistëve që të jenë të përqendruar dhe të harrojnë zhgënjimin e Kupës.
Pakult dha leksion në aspektin tekniko-taktik, pasi dhe goli i fundit i Rexhinaldos erdhi për shkak të një vendosjeje gabim të mbrojtjes. Futbollistët premtuan kthesën. (Panorama)
