Kukësi dhe Laçi do të jenë dy finalistët e Kupës së Shqipërisë. Për të dytin vit radhazi verilindorët do të përballen me kurbinasit në kuadër të këtij trofeu, ku vitin e kaluar e fituan bardhezinjtë që drejtoheshin nga Aramdno Cungu.
Kukësi ka siguruar finalen pasi mposhti me rezultatin e përgjithshëm 4-0 Flamurtarin e Vlorës. Skuadra e drejtuar nga Klodian Duro triumfoi në të dy takimet direkte me kuqezinjtë duke fituar 2-0 në secilin.
Në sfidën e zhvilluar sot në “Zeqir Ymeri” Kukësi ka zhvilluar një lojë të mirë duke dominuar dhe arritur të realizojë dy herë në portën kundërshtare.
Pjesa e parë është mbyllur në shifrat e bardha 0-0, ndërkohë në të dytën vendasit janë rikthyer më në formë, duke marrë avantazhin me anë të Eminit i cili nuk gaboi nga pika e bardhë ndërsa mesfushori brazilian Erik Flores dyfishoi rezultatin. Dy gola të shpejtë kanë mjaftuar që kuksjanët të prekin përsëri finalen e Kupës.
Skënderbeu fiton përballjen ndaj Laçit në shtëpi por nuk ja del të prekë finalen. Janë përsëri kurbinasit që sigurojnë finalen e Kupës së Shqipërisë falë golit të realizuar në fushën kundërshtare.
Korçarët arrijnë të fitojnë sfidën në stadiumin e tyre me rezultatin 2-1, por nuk kanë mjaftuar golat e Prognit dhe Plakut për një biletë në finale. Laçjanët i besojnë malazezit Çetkoviç i cili shënon golin e triumfit për skuadrën dhe në fund janë miqtë që festojnë.
Dhe pas shumë përpjekjeve nga vendasit për të gjetur rrjetën e tretë, skuadra e udhëhequr nga Ramadan Ndreu është treguar e kujdesshme në mbrojtje për të ruajtur rezultatin e favorshëm dhe ja del. Panorama Sport
