Policia italiane ka zbuluar një laborator kokaine në jug të Napolit, në një qytet në shpatet e vullkanit të Vezuvit. 5 persona janë arrestuar , përfshirë dy anëtarë të njohur të Mafia-s lokale. Gjithashtu policia ka vënë në pranga edhe tre shtetas kolumbianë, ka sekuestruar 7 kilogram kokainë dhe 20 litra lëng me bazë kokaine, e cila në treg kap një vlerë prej 3 milionë euro. Grupet e Mafias jugore italiane, veçanërisht ata që operojnë në Napoli dhe rrethinat e tij janë të njohur si importuesit më të mëdhenj të kokainës në Europë, e cila zakonisht vjen nga Amerika jugore. Policia italiane thotë se importi i saj ose rrugët e tregtimit dhe të kamuflimit janë sofistikuar shumë, shpesh herë në forma shumë të çuditshme maskuese. Autoritet shpjeguan se laboratori ishte ngritur në një banesë , pikërisht në kuzhinën e saj dhe përdorej për nxjerrjen e drogës nga një material plastik.
Nënkolonel në policinë financiare, Giuseppe Furciniti shpjegon se kolumbianët kishin ardhur në Itali mbase për të shpjeguar procesin e nxjerrjes së drogës nga plastika, pasi ata e kishin përgatitur dhe normalisht ishin të vetmit që dinin procesin e hapjes.
Furciniti nuk dha hollësi të mëtejshme për mënyrën e transportit të drogës nga jugu i Amerikës në jugun e Italisë, apo edhe faktin se si ranë në gjurmët e laboratorit të drogës, me argumentin se hetimet janë në vazhdim e sipër.
