Vaksina e prodhuar nga Pfizer për të luftuar koronavirusin mund t’u injektohet foshnjave deri në gjashtë muaj. Vaksinimi i të vegjëlve është në planet e gjigantit farmaceutik për këtë dimër.
Në një lëvizje që ka të ngjarë të shkaktojë polemika ndërkombëtare, kompania synon të aplikojë për autorizim për të imunizuar foshnjat amerikane brenda dy muajve të ardhshëm. Afati kohor do të varet nga gjetjet e provave të brendshme duke parë nëse vaksinat janë të sigurta dhe efektive tek të rinjtë e moshës gjashtë muaj deri në pesë vjeç.
Frank D’Amelio, zyrtari kryesor financiar në Pfizer, tha në një konferencë dje se firma planifikon ta “përfundojë dosjen” deri në nëntor, raporton Financial Times.
“Ne do të prisnim që të kishim … të dhëna për fëmijët mes moshës gjashtë muajsh dhe pesë vjeç që do t’i paraqisnim në FDA,” tha D’Amelio në Konferencën Globale të Kujdesit Shëndetësor Morgan Stanley.
Pfizer ndërkohë pret që të kërkojë miratimin nga Administrata e Ushqimit dhe Barnave (FDA) për vaksinimin e fëmijëve të moshës pesë deri në 11 vjeç deri në tetor. Por komentet e fundit konfirmojnë synimin e kompanisë për të punuar në grupmoshat shumë më të reja. Atyre do t’u jepet një dozë më e ulët se sa të rriturve.
Vaksina e Pfizer, e bërë së bashku me partnerin gjerman BioNTech, tashmë është miratuar për fëmijët mbi 12 vjeç në Britani.
/b.h
