Rusia, sipas një dokumenti që po qarkullon në Kombet e Bashkuara, planifikon të propozojë një proces të reformës kushtetuese në Siri, që do të zgjasë 18 muaj dhe do të pasohet me zgjdhjet e parakohshme presidenciale. Dokumenti nuk thotë nëse presidenti sirian, Bashar al Assad, duhet të mbetet në pushtet gjatë asaj kohe.
Ai thotë se “presidenti i Sirisë nuk do të drejtojë komisionin kushtetues” dhe se procesi i reformës do të udhëhiqet nga një kandidat, për të cilin bien dakord të gjitha palët. Rusia pritet të dalë me propozimet e saj gjatë bisedimeve për krizën në Siri, që do të mbahen të shtunën në Vjenë.
Rreth 20 vende dhe grupe ndërkombëtare pritet t’i ndjekin këto bisedime që objektiv kryesor kanë armëpushimin midis forcave të Assadit dhe atyre opozitare. Konflikti në Siri ka nisur qysh në mars të vitit 2011. Mbi 250,000 njerëz kanë humbur jetën, ndërsa miliona të tjerë janë zhvendosur.
