Ky person në këtë foto është 41-vjeçari, Naum Toshi, i cili në orët e para të mëngjesit të sotëm ka mbytur me tel dy fëmijet e tij 4 dhe 6 vjeç dhe më pas vari veten.
Referuar dëshmive të para të familjarëve dhe fqinjëve të tij, mësohet se zanafilla e tragjedisë nisi pasditen e djeshme kur bashkëshortja e tij, Marsela Toshi, punonjëse në një lokal nate në qytetin e Korçës ishte konfliktuar me Naum Toshin, i cili nuk e pranonte punën që ajo bënte.
Sipas pretendimeve të familjarëve dhe fqinjëve, çifti, ashtu si edhe më herët u konfliktuan sërish ç’ka pasoi edhe largimin nga banesa të 24-vjeçares, siç kishte vepruar edhe dy muaj më parë.
Sipas fqinjëve të tyre, gruaja ishte kthyer në banesë mbrëmjen e djeshme, ku ka qëndruar deri në orën 2 pas mesnate, me pretendimin për të marrë fëmijët e saj. Por pasi nuk e ka arritur këtë gjë është larguar.
Nga ky moment fqinjët rrëfejnë se kanë dëgjuar të bërtiturat dhe ulërimat e fëmijëve, por nuk e kanë menduar se 41-vjeçari do të arrinte deri aty sa të mund të kryente një krim të tillë.
Mësohet se gruaja e re, e cila kishte fëmijën 6 vjeç nga martesa e parë, dhe fëmijën 4-vjeçar nga martesa me Naum Toshin, e kishte denoncuar këtë të fundit, për faktin se e pengonte të punonte.
Ende nuk dihen nëse 41-vjeçari e ka kryer këtë krim makabër për t’u hakmarrë ndaj gruas së tij, por do të jenë hetimet e mëtejshëm ato që do të hedhin dritë mbi ngjarjen.
