Një email nga Kuvendi i Shqipërisë iu ka bërë të besdisura pushimet deputetëve. Një kërkesë nga zyra e financës iu kërkon deputetëve, në përfundim të legjislaturës së tetë, të bëjnë dorëzimet. Deputetëve iu kërkohet të dorëzojnë në Kuvend një laptop që kanë marrë në përdorim në fillim të mandatit të tyre në vitin 2013.
Kjo është përmbajtja e emailit:
“Të nderuar deputetë,
Na lejoni që të sjellim në vëmendjen tuaj se gjatë legjislaturës së VIII-të, ju jeni pajisur me laptop nga Kuvendi i SHqipërisë, për të cilin keni firmosur kartelën përkatëse të marrjes në dorëzim pranë shërbimit të Financës së Kuvendit.
Për sa më sipër, lutemi në mirëkuptimin tuaj, për dorëzimin e tyre pranë shërbimit të financës, duke qenë se përfunduan punimet e legjislaturës së 8-të”
-thuhet në email-in e Kuvendit për deputetët.
Historia e pajisjes së deputetëve me pajisje teknologjike është kthyer disa herë në një arenë debati. Në muajt e fundit të detyrës së ssaj si kryeparlamentare, Jozefina Topalli iu vendosi në seancën plenare deputetëve nga një kompjuter, i cili u refuzua edhe nga vetë ligjvënësit.
Ata u ankuan se kompjuterët mbi tavolinë i pengonin të ndiqnin folësin në seancë, dhe se ishin të shqetësuar që ekrani i madh mund të monitorohej qoftë nga kolegët pas tyre, qoftë nga kamerat e televizioneve që në seancë rrinë në llozhën mbi sallën e seancave.
Në këto kushte kur deptuetët ndiheshin jo komodë dhe pretendonin se ju cenohej privatësia, ndër gjërat e para që Meta bëri në krye të parlamentit, ishte heqja e këtyre kompjuterave, dhe pajisja e cdo deputeti me një laptop.
Tani është koha që ligjvënësit edhe laptopët t’i dorëzojnë, dhe deputetët e rinj të presin vendimin e kryeparlamentarit të ri, për tu rikthyer sërish tek kompjuterët, për të marrë laptopë, apo për të avancuar në pajisje teknologjike brenda sallës së kuvendit, ku mund të aksesojnë online dokumentet parlamentare”.
