Kuvendi i Shqipërisë është shprehur kundër rritjes së akcizës për birrën vendase duke votuar me 81 vota pro ndaj amendamentit të paraqitur nga deputeti Përparim Shehu për të mos rritur akcizën. Rritja e kësaj akcize parashikohej në paketën fiskale për vitin 2016, ku kishte një rritje me 11% të saj, ndërsa për importin e birrës parashikohej një ulje me 15 %. Kësisoj në fuqi mbetet ligji i viti 2013. Amendamenti i deputetit Shehu u votua me 81 vota pro.
Sakaq, ndër dy votat kundër këtij amendimi ishin ajo e Kryeministrit Rama dhe kreut te Komisionit të Ekonomisë Erjon Braçe.
Deputeti Përparim Spahiu, foli para votimit të amendamentit të propozuar prej tij duke parashtruar dy argumente, se përse nuk duhej rritur akciza për birrën vendase.
Së pari, birra vendase nuk ka patur asnjë efekt negativ në buxhet, këtë mund ta konfirmojë edhe ministri i Financave, dhe së dyti, nëse ajo rritet rrezikon që ky biznes të dëmtohet duke u mbyllur me qindra vende pune. Mosrritja e akcizës i vjen në ndihmë prodhimit vendas dhe s’duhet të rrezikojmë humbjen e tyre. Besoj që dy argumentet për mos ndryshimin e akcizës së birrës vendase janë mëse të mjaftueshme për ta votuar këtë amendament.
Ky ndryshim për akcizën e birrës vendase është komentuar si një ligj që do të godiste prodhimin vendas e do të favorizonte kompanitë e huaja që importojnë në Shqipëri.
