Kreu i Partisë Demokratike, Sali Berisha, mbajti një fjalë në Parlament pas një minute heshtjeje në nder të ish-deputetit socialist Andis Harasani, i cili u nda nga jeta.
Berisha vlerësoi figurën e Harasanit, duke e cilësuar atë si një politikan të ri, të shkolluar dhe të përfshirë në proceset demokratike që nga fillimi. Megjithatë, ai akuzoi Partinë Socialiste dhe “Rilindjen” për përjashtimin e tij nga politika.
“Ju e përzutë atë dhe duhet të kërkoni ndjesë. Rilindja e përzuri atë. Ai nuk bëri kurrë kompromis me të keqen siç bëtë ju me radhë,” – deklaroi Berisha.
“Mendoj se aktet e nderimit duhet të jenë të plota dhe të sinqerta. Andis Harasani i përkiste një plejade politikanësh të ri. E vërteta, i shkolluar mirë, i kyçur në proceset demokratike që në fillim , nuk mund të mohohet se ju e përzutë atë dhe duhet të kërkonit ndjesë, jo ju personalisht, por Rilindja e përzuri atë. E kam nderuar me bindje të plotë për atë që thashë sepse një politikan që rininë ia kushtoi ndryshimit të Shqipërisë, e kam nderuar se mbeti socialist, besnik i atyre parimeve që besonte deri në ditën e fundit. Një patritot, një njeri që nuk pranoi të bënte kurrë një kompromis me të keqen siç bëtë ju. Ju garantoj se përfaqësoj mendimin e mijëra socialistëve që e prisnin sot nga ju”-u shpreh Berisha.
“Largimi i një njeriu nga kjo botë nuk duhet të jetë objekt cinik diskutimesh partiake dhe elektorale. U ngritëm në këmbë për të nderuar kujtimin e tij dhe i shprehëm ngushëllimet familjes së tij”-u shpreh Spiropali.
