Kuvendi i Shqipërisë ka njoftuar hedhjen e shortit për Këshillin e Emërimeve në Drejtësi më datë 7 Dhjetor.
Ky vendim vjen pas refuzimit të Presidentit Ilir Meta, i cili u shpreh se për shkak të vakuumit ligjor, nuk mund ta hidhte shortin.
Meta i ofroi Kuvendit precedentin e një viti më parë, ku ligjvënësve i lind e drejta për ta hedhur shortin nëse Presidenti tërhiqet.
Njoftimi i Kuvendit të Shqipërisë:
Në mbështetje të pikës 3 të nenit 149/d, dhe nenit 284 të ligjit nr. 115/2016 “Për organet e qeverisjes së sistemit të drejtësisë”, Kryetari i Kuvendit, me Urdhrin Nr.1, datë 3.12.2018, ka vendosur hedhjen e shortit për zgjedhjen e anëtarëve të Këshillit të Emërimeve në Drejtësi, në datën 7 dhjetor 2018, ora 10:00, në ambjentet e Kryesisë së Kuvendit.
Shorti është i hapur dhe zhvillohet në prani të:
-Avokatit të Popullit;
-përfaqësuesve nga Gjykata Kushtetuese, Gjykata e Lartë, Prokuroria e Përgjithshme dhe Këshilli i Lartë i Drejtësisë;
-përfaqësuesve të grupeve parlamentare;
-anëtarëve të Komisionit të Pavarur të Monitorimit;
-përfaqësuesve të përfaqësive të huaja diplomatike të akredituara në Republikën e Shqipërisë dhe organizatave partnere ndërkombëtare,
-medias.
Bashkëlidhur Urdhri nr.1, datë 3.12.2018 i Kryetarit të Kuvendit, për datën dhe orën e organizimit të shortit, dhe Urdhri nr. 2, datë 3.12.2018, i Kryetarit të Kuvendit “Për përcaktimin e procedurës dhe rregullave të hedhjes së shortit për zgjedhjen e anëtarëve të Këshillit të Emërimeve në Drejtësi (të përkohshëm)”.
/A.Rada
