Kuvendi dhe çeshtja “Prenga”, bankoprova e aleancës Rama-Meta
Në këto minuta pritet të nisë sesioni vjeshtor i Kuvendit të Shqipërisë. Ditët e fundit, jeta politike u dominua nga dy ngjarje madhore: nga njëra anë akuzat e opozitës ndaj kreut të parlamentit Ilir Meta për afera të pretenduara në kohën kur bashkëqeveriste me të djathtën, si dhe goditjet ndaj ministrit të brendshëm Saimiri Tahiri, pas një interviste të një ish-punonjësi policie. Tema e dytë e madhe e debatit, e cila përplasi pozitën dhe opozitën, ishte ajo e incidentit me armë, ku u përfshi deputeti socialist Armando Prenga.
Sot Kuvendi do të nisë nga puna, me shumë gjasë, me këto dy tema. Opozita ka kërkuar tashmë dorëheqjen e Metë dhe Tahirit. Ndërkaq, e gjitha kjo dinaikë ngjarjesh ka si sfond ftohjen e heshtur verore, mes dy protagonistëve të të majtës. Rama dhe Meta janë takuar para pak minutash, në prag të seancës kuvendore, për herë të parë që nga korriku, kur ndodheshin në pritjen e ambasadorit Lu, në festën kombëtare të SHBA-ve. Për pasojë, peripecitë e seancës së sotme parlamentare, pritet të venë në provë, ndër të tjera, edhe marrëdhënien mes dy krerëve të koalicionit qeverisës. Imagjinohet që përballë sulmit të opozitës, diferencat dhe hatërmbetjet mes të dyve të lihen mënjanë. Të paktën përkohësisht. S.M
