Opozita duket se është zbutur në qëndrimet e saj, karshi maxhorancës. Ndërprerja e fjalës së deputetes së PD-së Albana Vokshi është bërë shkas për përplasjen mes opozitës dhe maxhorancës në seancën e sotme. Seanca është hapur me interpelancën e ministres së Kulturës Mirela Kumbaro, të kërkuar nga deputeti i PS-së Alket Hyseni, por kjo gjë nuk është pranuar nga opozita.
Deputetja Vokshi ka kërkuar fjalën për procedurë, pra për të folur për të njëjtat tema të prekura nga ministrja por sapo ka nisur fjalinë e parë është ndërprerë nga kreu i Kuvendit Gramoz Ruçi.
Ajo ka këmbëngulur të vazhdojë të flasë por fonia është ndërprerë. Ruçi i ka bërë vërejtje Vokshit dhe ka vendosur 5 minuta pushim. Megjithëse fillimisht u kundërshtua në kor nga deputetetët demokratë, pas rifillimit të seancës, PD-së i ka mjaftuar një kritikë për kreun e Kuvendit.
Kreu i grupit parlamentar të PD-së Edmond Spaho tha se nuk duan të bëhen shkak për ndërprerjen e seancës por se veprimi i Ruçit nuk ishte korrekt dhe se nuk duam të ndodhë më.
“Zonja Vokshi do fliste për procedurë por renditjen e interpelancave. Më parë ato bëheshin në fund të seancës. Ne nuk duam të bëhemi shkak që të ndërpritet seanca. Ju ja pretë fjalën por veprimi juaj nuk ishte korrekt dhe me pa tëdrejtë ja ndërpretë fjalën. Nuk duam të ndodhë më”, tha Spaho.
Më pas Ruçi tha që rregullorja nuk e përcakton se kur duhet të bëhen interpelancat por se mund të kalojnë edhe në fund të tyre.
Kujtojmë se që nga nisja e sesionit të ri parlamentar, seancat janë ndërprerë disa herë për shkak të përplasjeve të shkaktuara nga ndërprerja e fjalës së deputetëve të PD-së, përfshi Sali Berishën e Lulzim Bashën. /b.d
