Në vijim të replikave të tij, kryeministri Rama tha se e mirëpret bashkëpunimin e opozitës nëse dëshiron të angazhohet për të mirën e vendit.
“Nëse doni të jepni një dorë, jepeni. Shqiptarët mund të kenë shumë halle, por kanë një nga gjërat që ju vazhdimisht e harroni. Për budallenj nuk i bën dot askush. Monika të bën të ndihesh i fortë, por nuk të rrit dot. Rritu Lul, rritu” – tha Rama ndër të tjera.
***
Basha dhe Rama kanë vijuar sërish replikat mes tyre. Kreu i PD u kërkoi socialistëve të ndalin “këtë buxhet të krimit”, ndërsa në përgjigje Rama i kujtoi Bashës çadrën. “Bërtisje të ngriheshin, por prape erdhe dhe u ule me mua dhe prapë do të vish të ulesh me mua”, tha Rama.
“Të ndalim këtë buxhet të krimit. Ky nuk është një moment për të bërë politikë. Ngrihuni në lartësinë e socialistëve të ndershëm. Ky nuk është buxhet, është prove e krimit dhe do të çmontohet njësoj si kjo qeveri e vdekur politikisht“, tha Basha
“Nuk doja të ngrihesha dhe mu kujtua çadra. Bërtisje të ngriheshin, por prape erdhe dhe u ule me mua dhe prapë do të vish të ulesh me mua. Jo vetëm se është dita ndërkombëtare e tolerancës, por sepse duke u ulur bashkë do të bëhet më mirë për vendin. The SHBA, Gjermania, Italia. Janë këtu Lul, janë në ministrinë e Brendshme. Punojnë me ne Lul, janë me ne. The u kap drogë, po 900 tonët e Lazaratit pse nuk i kapte askush“, tha Rama
***
Si kreu i PD-së, ashtu edhe kryeministri, kanë vijuar të citojnë Papa Françeskun në çdo replikë të tyre që prej nisjes së seancës në Kuvend.
“Sot është dita ndërkombëtare e Tolerancës dhe unë nuk mundem dot veçse të buzëqesh duke replikuar me shpifjet që më adresoi shumë i dashuri Lul”.
Kështu e nisi replikën e tij Edi Rama, i cili citoi sërish Papa Françeskun.
“Flisni vetëm për mëkate dhe skandale sepse ju intereson një pemë që bie dhe jo pylli që rritet” – tha kryeministri.
Sipas tij Shqipëria është vendi më i përshtatshëm turistik me dy dete, dhe me terren të shfrytëzueshëm.
“Por sot jemi i vetmi vend që nuk kemi një hotel me pesë yje. Jo ylla të prerë të lyer me të verdhë e të ngulur atje që kanë emrin e pronarit dhe një ‘Palace’ nga mbrapa” – tha Rama.
Ai theksoi se qeveria nuk po bën shpikje, por po adapton legjislacionin e ngjashëm me vendet e tjera në Mesdhe.
“Po marr si shembull Malin e Zi që na ka lënë targën e nuk ia shohim më. Si do të bëhet ky pastrim parash, kur paketa është shumë e qartë?” – replikoi kryeministri.
Rama zbardhi dhe emrin e aplikuesit të parë që kërkon të bëjë një investim të tillë.
“Është votues dhe mbështetës i PD-së. Quhet Avni Ponari dhe kërkon të ndërtojë një hotel me pesë yje në Valbonë. Paratë e kujt po pastron ky?” – tha Rama.
“Je një kopje e pagëlltitshme e Lulit të Vocërr”, tha Rama.
Basha deklaroi se ky është buxheti i pastrimit të parave dhe varfërimit të shqiptarëve. “Nuk ka investitorë europianë që duan të ndërtojnë hotelë me 5 yje, është flota e trafikantëve të drogës që kërkon të ndërtojë hotele me 5 yjë për të pastruar paratë”, deklaroi Basha.
“Ke marrë fund politikisht dhe nga pikëpamja logjike dhe e fjalëve. Dërdëllit më batuta dhe diversionë për njerëz që i etiketon si financues të një partie apo një tjetre. Katër vjet me radhë u bërë gazi i botës me drogën dhe tani na thua se e mposhte drogën. Paniku të bën qesharak. Nuk jam këtu të merrem me ty, më intereson vendi. Ky është buxheti i pastrimit të parave dhe varfërimit të shqiptarëve. Ka hotele me 5 yjë në Shqipëri, ti dhe ministrat e tu i njihni shumë mirë. Nuk ka investitorë europianë që duan të ndërtojnë hotelë me 5 yje, është flota e trafikantëve të drogës që kërkon të ndërtojë hotele me 5 yjë për të pastruar paratë”, deklaroi Basha.
https://www.facebook.com/edirama.al/videos/10155314318656523/
/JavaNews/b.d
