Një aksident ajror është regjistruar mëngjesin e së martës në rajonin e largët lindor rus, ku u përfshi një nga avionët luftarakë më të sofistikuar, i njohur si “Sukhoi Su-57.”
Avioni që nuk kapet nga radarët dhe që kushton plot 155 milionë dollarë u rrëzua në rajonin e Khabarovsk gjatë një testimi dhe ky konsiderohet si rasti i parë që një mjet i tillë, i konsideruar si një ndër më të avancuarit, të përfshihet në aksident. Fatmirësisht piloti doli në kohë nga kabina dhe shpëtoi pa lëndime.
Ministria ruse e Mbrojtjes bëri me dije se do të ngrejë një komision të posaçëm për të hetuar shkaqet që çuan në rrëzimin e avionit “Sukhoi Su-57.”
