Duke analizuar vendimin e Gjykatës Kushtetuese, e cila rrëzoi dekretin e presidentit të Republikës, Bajram Begaj, i cili kishte caktuar datën 9 nëntor 2025 për zhvillimin e zgjedhjeve të pjesshme vendore në Bashkinë e Tiranës, dy avokatët, Arbër Hoxha dhe Përparim Çaça të ftuar në emisionin “Në Kohë Reale” të RTSH1 e vlerësuan atë si një hap vendimtar për mbrojtjen e Kushtetutës dhe parandalimin e precedentëve të rrezikshëm.
Avokati Hoxha theksoi se Gjykata Kushtetuese “ka treguar integritetin e saj maksimal dhe është ngritur në lartësinë e situatës, duke kthyer legjitimitetin dhe kushtetueshmërinë. Kjo i ka prerë rrugën një precedenti të rrezikshëm: shkarkimin e të zgjedhurve vendorë vetëm për shkak të masës arrest me burg apo arrest në shtëpi”
Ai vuri në dukje se “dekretimi i presidentit jo vetëm që është anuluar dhe pezulluar më herët, por është konstatuar si antikushtetues. Në këto kushte, z. Veliaj do të qëndrojë në detyrë deri në fund të mandatit. Duke qenë se ai mbetet në detyrë, nuk do të ketë zgjedhje në Bashkinë e Tiranës.”
Nga ana e tij, avokati Përparim Çaça u shpreh se pikëpyetja e vetme që ai kishte ishte nëse Kushtetuesja nuk do të mund të dilte me një vendim të qartë.
“E vetmja frikë që kisha ishte nëse Kushtetuesja nuk do të mund të dilte me një vendim të qartë, pra, nëse do të ishte 4 me 4 në vota. Ky është një precedent shumë i rëndësishëm për garancitë kushtetuese të organeve të zgjedhur të pushtetit lokal.
Duhet të presim motivin e plotë të vendimit, por ankimi i z. Veliajt është pranuar, duke rrëzuar në thelb vendimmarrjen e Këshillit të Ministrave. Sa i përket dekretit presidencial, ai ishte antikushtetues që në krye të herës – nuk ka nevojë të flasim më për të”, theksoi Çaça.
