At Sava Janjiç ka arritur të bllokojë bartjen e 25 hektarëve tokë problematike në Deçan në pronësi të shtetit deri më 29 shkurt 2016, shkruan Koha Ditore. Gjykata Kushtetuese e Kosovës i ka vënë masë të përkohshme çështjes së tokës të cilat Dhoma e Posaçme e Gjykatës Supreme kishte vendosur se i takonin ndërmarrjeve shoqërore “Apiko” dhe “Iliria”.
Kushtetuesja thotë se nëse vazhdojnë më tutje procedurat, Manastiri mund të pësojë dëme të pariparueshme. Si argument të fortë ka përmendur faktin që Manastiri është nën mbrojtjen e UNESKO-s. At Janjiç ka bërë kërkesë në emër të Manastirit të Deçanit për vlerësim të kushtetutshmërisë se dy vendimeve të 12 qershorit 2015 të Kolegjit të Ankesave të Dhomës së Posaçme të Gjykatës Supreme të Republikës së Kosovës për çështje që lidhen me Agjencinë Kosovare të Privatizimit.
