Ministrja e Energjisë dhe Infrastrukturës ka mbajtur sot një dëgjesë me përfaqësues të grupeve të interesit të tregtarëve të makinave. Ajo tha se kishte zgjedhur këtë formë komunikimi me përfaqësues të këtij sektori për të marrë drejtpërdrejtë shqetësimet e tyre lidhur me aktivitetin e tregtimit të makinave.
“Arsyeja pse ju kam ftuar është pasi u bë disa ditë që kemi marrë disa mesazhe prej disa prej jush që ngrenë shqetësimin për VKM-në 635 e cila ka pasur ndikim në punën që ju bëni. Ne sot këtu jemi për të dëgjuar. Kini parasysh që Shqipëria kërkon të aderojë në BE. Ne duhet të përmbushim disa kushte që lidhen edhe me mjetet motorike”
Përfaqësuesit e grupeve të interesit shfaqën shqetësimin lidhur me kushtet e reja të tregtimit të makinave në vend.
“Ne jemi dakord, por ju keni nxjerrë një VKM që thotë në një 10-vjeçar por ne furnizojmë popullin që blen një makinë nga 2-3 mijë euro, ndërsa problemi i targimit na duket absurd. Pse duhet të targoj unë makinat që i kam në emër të firmës, ky është një dëm ekonomik për biznesin tonë. Pse duhet ta targoj automjetin pa e shitur akoma? Përderisa makina nuk qarkullon nuk ka pse të targohet”
Ministrja tha se në vijim përfaqësuesit e Ministrisë do kontaktojnë personalisht me secili prej tyre për t’i dhënë zgjidhje problematikave të tyre.
“Menjëherë sapo ju shfaqni shqetësimin ne ju kontaktojmë. Është praktikë pune që ne dëgjojmë problematikën tuaj. Ju nxis të përdorni pltaformën e bashkëqeverisjes. Dëgjesa e sotme është e nevojshme dhe besoj se të gjithë përfaqësuesit tanë mbajtën shënimet e duhura. Dhe ne do ju kontaktojmë personalisht për t’i dhënë zgjidhje problematikave tuaja. Mbetemi në kontakt. Është kënaqësi për mua të njihem me problemin drejtpërdrejtë nga grupet e interesit. Licensimi është një problem më vete përsa i përket burokracisë, por do marrë zgjidhje shumë shpejt”.
/a.meta
