“Situata ku ndodhemi është një situatë pa precedent e cila nuk ka ndodhur më parë as në Shqipëri dhe as në një vend tjetër. Opozita ka vendosur të djeg mandatet të largohet nga parlamenti që në fakt është baza e demokracisë dhe nga ana tjetër këtë opozitë shpesh e shohim të bëjë protesta të dhunshme. Duhet ta sqarojmë që këto nuk janë revolta popullore po thjesht protesta opozitare. Ne nuk i konsiderojmë protesta qytetare pasi protestat qytetare nuk kanë axhendë politike dhe as data të përcaktuara, revoltat popullore ndodhin natyrshëm nga qytetarët ”, u shpreh deputetja e Partisë Socialiste Evis Kushi në një studio televizive.
Ajo gjithashtu u shpreh se, ”ne jemi të gatshëm për dialog me opozitën për të diskutuar çështje të rëndësishme për të ardhmen e vendit, jemi të gatshëm të diskutojmë dhe për garancitë që ka nevojë opozita në lidhje me zgjedhjet e ardhshme, por ama ne nuk mund të negociojmë rregullat bazë të demokracisë, ne nuk mund të negociojmë vullnetin e qytetarëve i cili e shpreh atë me anë të votës, pra ne nuk mund të negociojmë në kundërshtim me kushtetutën. Opozita duhet të jetë e qartë pasi ajo nuk mund të vijë në pushtet me protesta dhe as me negociata me ndarje pushteti në tavolinë”.
”Ne jemi të vendosur të vazhdojmë reformat, të vazhdojmë punën tonë të përditshme, ne jemi të gatshëm të ulemi të diskutojmë për reformën zgjedhore. Pra të diskutojmë rregullat e lojës përderisa opozita akuzon vazhdimisht për vjedhje votash që natyrisht nuk qëndron sepse në zgjedhjet e 2017 të gjithë jemi dëshmitarë se ato zgjedhje u vlerësuan nga institucionet ndërkombëtare si OSBE-ODIHR po ashtu dhe nga gjithë komisionerët u pranua rezultati I zgjedhjeve dhe nuk pati asnjë ankimim”, tha Kushi.
Ajo shtoi se, ”opozita le të vij në tavolinë meqë ka dyshime për vjedhje votash të ulemi dhe të bëjmë reformën zgjedhore. Opozita prej 1 viti e gjysmë nuk është paraqitur fare të diskutojmë, ndërkohë që ne e kemi përgatitur draftin i cili përmban të gjitha sugjerimet edhe të institucioneve ndërkombëtare gjithashtu aty përmbahen dhe shqetësimet e opozitës”.
”Ngërçi i situatës ku ndodhemi nuk është institucional, pra nuk kemi krizë të përgjithshme politike pasi mazhoranca vazhdon punën e saj, kriza dhe ngërçi është vetëm brenda opozitës. Ndërkohë qeveria vazhdon punën dhe ka avancuar me reformat dhe vlerësimet e institucioneve ndërkombëtare janë pozitive dhe përsa i takon integrimit në Bashkimin Europian. Kjo tregon që kriza është vetëm tek opozita dhe për këtë nuk ka arsye të shkojmë në zgjedhje të parakohshme siç pretendon opozita. Zgjedhje të parakohshme nuk ndodhin pasi ato do të ndodhnin vetëm nëse do kishim një krizë brenda mazhorancës gjë që nuk është e vërtetë dhe nëse do të kishim revoltë popullore gjë e cila dhe kjo nuk ndodh pasi janë protesta opozitare”, theksoi ajo.
”Kjo situatë dëmton hapjen e negociatave, këto lloj qëndrimesh janë në interest të vendeve antieuopiane të cilat kërkojnë të krijojnë destabilitet në Ballkan. Dëmi gjithashtu është i madh dhe përsa I takon ekonomisë sepsë dhe investitorët e huaj do jenë dyshues për të investuar ketu gjithashtu kjo ndikon dhe në sezonin turistik pasi këto pamje të këtyre protestave të dhunshme do ti bëjë turistët të hezitojnë për të vizituar Shqipërinë. Kjo ndikon dhe tek vetë shqiptarët pasi kur ka destabilitet njerëzit nuk kanë siguri për të ardhmen. Pra nga kjo situatë ka veyëm efekte negative dhe unë shpresoj që opozita të bëhët më e përgjegjshme pasi dëmi që po i bën Shqipërisë është i konsiderueshëm”, tha Kushi.
”Kandiadtët që po pranojnë manadatet janë në të njëjtat lista ku kanë qenë dhe ish- deputetët e opozitës. Kjo është një gjë e mirë pasi tregon se brenda opozitës ka dhe njerëz të përgjegjshëm që zbatojnë detyrimin kushtetues që kanë dhe detyrimin patriotik ndaj vendit. Këto janë deputetë të rinj të opozitës dhe jo një opozitë e re. Këta deputetë janë përgjigjur gjithashu dhe thirrjeve të ndërkombëtarëve për të pranuar detyrën. Detyra e çdo opozitari është të jetë në parlament, të bëj opozitë dhe të jetë konstruktiv jo shkatërrues”, përfundoi deputetja e Partisë Socialiste Evis Kushi.
/a.meta
