Bashkëpunimi mes sektorit Publik dhe atij Privat në fushën e Laboratorëve ka krijuar nga laborantët një zhurmë artificiale. Duket se këta të fundit po përdoren nga persona të ndryshëm, të cilëve iu prishen interesat financiare që kanë në këtë sektor. Dhe që laborantët po përdoren si zhurmues është fare e qartë, pasi këta të fundit asnjëherë nuk kanë kundërshtuar vendimet e marra më herët ndaj tyre, edhe kur bëhej fjalë për shkurtimin e vendit të punës në mënyrë të drejtpërdrejtë.
Kështu, nga shifrat e siguruara nga burime pranë Qendrës Spitalore Universitare “Nënë Tereza” rezulton se në vitin 2013 në Sektorin e Laboratorit ishin të punësuar 103 persona mes të cilëve 9 ishin me detyrën kryelaborantë dhe 94 të tjerët teknikë laboratori. Ndërkohë në vitin 2016 rezulton se në total janë 88 persona të punësuar, ku 5 prej tyre janë me detyrë kryelaborantë dhe 83 të tjerë laborantë.
Përgjatë këtyre 4 viteve asnjë prej laborantëve apo kryelaborantëve nuk ka dalë në protestë për të mbrojtur vendin e tyre të punës, apo për deklaruar se është kundër largimit të eprorit të tyre, që në këtë rast është kryelaborantët, që sot janë të përgjysmuar në numër.
E njëjta gjë ka ndodhur edhe në rastet kur shumë prej këtyre teknikëve të laboratorit, mjekëve apo edhe Shefave të Shërbimit Laboratorik shumë prej pacientëve i përcillnin drejt klinikave private për kryerjen e analizave, pasi një pjesë të tyre nuk mund ti realizonin. Edhe në këtë rast kjo kategori e bluzave të bardha nuk ka protestuar, nuk ka denoncuar “padrejtësinë” që po kryhej me profesionin e tyre.
Atëherë përse ndodh kjo zhurmë artificiale, kur këtyre laborantëve sot iu garantohet kushte pune më të mira, aparatura të fjalës së fundit, reagentë dhe kite të cilat do të mundësojnë kryerjen e të gjitha analizave, por ajo që është më e rëndësishme shtimin në numër të tyre çka do të sjellë edhe formim më të gjerë profesional të tyre.
Por duket se gënjeshtrat e zhurmuesve janë më të besueshme dhe bindëse për laborantët, duke i përdorur këta të fundit në mënyrën më të shëmtuar për të krijuar pengesa për reformat të cilët janë gjithmonë në shërbim të pacientëve, duke u ofruar atyre një shërbim sa më cilësor dhe të shpejtë, dhe sigurisht pa pagesë./Lexo.al
